Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Азәрбајҹан Ислам Партијасынын (АИП) сәдри Мөвсүм Сәмәдов, онун гајыны Фирдовси Мәммәдрзајев, әмиси оғлу Дәјанәт Сәмәдов, партијанын сәдр мүавини Вагиф Абдуллајев вә Астара рајон тәшкилатынын сәдри Руфулла Ахундзадә, руһаниләр Сејјид Фәрамиз Аббасов вә Зүлфүгар Микајылзадәнин Ағыр Ҹинајәтләрә даир Мәһкәмәдә онлары ШӘРЛӘЈӘРӘК верилән һөкмлә бағлы веридикләри апеллјасија шикајәтинә бахылды.
Мәһкәмәнин тәркиби елан олунду. Мәһкәмәнин сәдри Һәсән Әһмәдовун өзүнү вә һакимләр Мирпаша Һүсејнов, Елхан Сүлејманов тәгдим етдикдән сонра иҹлас башлады. Илк өнҹә тәгсирләндирилән шәхсләрин иттиһам олундуглары маддәләр охунду.
Хатырладаг ки, Елдар Исмајыловун һакимлик етдији мәһкәмәдә Азәрбајҹан Ислам Партијасынын (АИП) сәдри Мөвсүм Сәмәдов 12 ил, Фирдовси Мәммәдрзајев 10 ил, әмиси оғлу Дәјанәт Сәмәдов 10 ил, партијанын сәдр мүавини Вагиф Абдуллајев 11 ил, Астара рајон тәшкилатынын сәдри Руфулла Ахундзадә 11 ил 6 ај, Сејјид Фәрамиз 11 ил азадлыгдан мәһрум едилиб. Зүлфүгар Микајылзадәјә исә 5 ил сынаг мүддәти олмагла 5 ил шәрти һөкм охунмушду.
Сонра Дәјанәт Сәмәдову вәкил Һәбиб Әлијев, Мөвсүм Сәмәдов, Руфулла Ахундов вә Вагиф Абдуллајеви вәкил Анар Гасымлы, Зүлфүгар Микајылзадәни вәкил Рүстәмов, Фәрамиз Аббасову вәкил Мәнсим Бајрамов вә Фирдовси Мәммәдрзајеви вәкил Шәфа Ҹамалзадәнин мүдафиә едәҹәји билдирилди.
Һаким Һәсән Әһмәдов бу ҝүн танышлыг мәһкәмәси олдуғуну вурғулајараг, вәсадәтлә чыхыш етмәк истәјәнләрә сөз верди.
Илк олараг Дәјанәт Сәмәловун вәкили Һ.Әлијев вәсадәтлә чыхыш едәрәк билдирди ки,әввәлки мәһкәмәдә шаһидләр бир-бирләринә зидд ифадә верибләр: «Мәсҹидин ахунду Һаҹы Наил башда олмагла бәзи шаһидләр исә үмумијјәтлә диндирилмәјиб. Бу сәбәбдән онларын јенидән мәһкәмәјә дәвәт едилмәси барәдә вәсатәт верирәм».
Даһа сонра вәкил Анар Гасымлы исә чыхышында биринҹи инстансија мәһкәмәсиндә олан експертиза рәјинә мүнасибәтини билдирди: «Експертиза рәји верәнләрин һеч биринин буна сәлаһијјәти чатмырды. Физиолог, филолог вә психолог чыхышын дөвләт чеврилишинә аид олмасы барәдә рәј верә билмәз».
О, мүдафиә етдији шәхсләрдән Вагиф Абдуллајевә гаршы мәһкәмә мүддәтиндә һеч бир дәлил-сүбут ҝөстәрилмәдән 11 илл мүддәтинә азадлыгдан мәһрум едилдијини билдирди: «Бу гәдәр ҹәза вермәләри исә онунла изаһ едибләр ки, МТН онун барәсиндә мәктуб ҝөндәриб вә она гаршы мүвафиг ҹәза верилмәсини мәгсәдәујғун сајыб. Биз ајдынлашдырмалыјыг ки, һансы фактлар вә сүбутлардыр ки, бу ҹәзаны мәгсәдәујғун сајыр».
Вәкил мүдафиә етдији Руфулла Ахундова гаршы да әдаләтсизлик олдуғуну билдирди: «Ҝәлән шаһидләрин һеч биринин ифадәси тәсдиг олунмајыб. Тәсдиг олунмајан ифадәләрлә исә һөкм чыхарылыб».
Анар Гасымлы сон олараг мәһкәмәнин истинтагла кечирилмәси барәдә вәсатәт галдырдығыны билдирди.
Даһа сонра сөз Фәрамиз Аббасовун вәкили Мәнсим Бајрамова верилди: «Мән бу мәсәләдә јени олсам да, иш материаллары илә танышлыгдан сонра бундан әввәлки мәһкәмәнин гәрарынын јанлыш олдуғуну ҝөрдүм. Әлавә шаһидләрин дәвәти бир јана галсын, иттиһамын өз шаһиди мүдафиә етдијим шәхсин үзүнә дурмајыб вә алдадылдыгларыны, Фәрамиз Аббасову да танымадыгларыны билдириб. Мәһкәмә исә нә үчүнсә онларын истинтага вердији ифадә илә кифајәтләниб. Беләликлә дә кобуд проседур позғунлуғуна јол верилиб».
Фирдовси Мәммәдрзајевин вәкили Шәфа ханым да ејни дәлилләрлә чыхыш етдијини билдирди: «Мүдафиә етдијим шәхсин тәгсири јалныз бир шаһидин сөзү илә сүбут олунмуш сајылыб. 1 нәфәрә ҝөрә исә 10 ил мүддәтинә азадлыгдан мәһрум етмәк абсурддур. Бу һәмчинин 6-ҹы ковенсијанын позулмасы демәкдир».
Зүлфүгар Микајылзадәнин вәкили Рүстәмов диҝәрләринин вәсатәти илә разылашдығыны билдирди. Сонра сөз мүттәһимләрә верилди.
Јени проркрорла Руфулла Ахундзадәнин сөзү чәп ҝәлди
Јени прокурор Маһир Аббасов чыхышы заманы Ағыр Ҹинајәтләр мәһкәмәсинин гәрарыны дәстәкләдијини билдирәрәк, бүтүн сүбутларын тәдгиг олундуғуну вә әдаләтли гәрар чыхарылдығыны билдирәндә Руффула Ахундзадә әсәбләшди. “Сән дә башладын јалан данышмаға. Һәлә ҝет бир өјрән ҝөр әввәлки прокурор Вүгар Гулијев нә ҝүндәдир. Голу-гычы сыныб галыб јердә. Сән дә белә еләсән ондан пис ҝүнә галаҹагсан.”
Даһа сонра Руфулла Ахундзадә ев дустаглығы илә әвәз олунмасыны истәди.
Фәрамиз Аббасов онлара мүлаһизәләрлә иш кәсилдијини билдирди: «Амма мәһкәмә диварларында ири һәрфләрлә јазылыб ки, мәһкәмәнин ҝедишатиы мүлаһизәләрә сөјкәнмәмәлидир».
Вагиф Абдуллајев исә сон ҝүнләр сәһһәтинин писләшдијини билдирди: «Ҝедиб јохлаја да биләрсиниз. Елә бир ҝүн јохдур ки, тибб мәнтәгәсиндә јохланышдан кечмәјим. Бу сәбәбдән гәти –имкан тәдбиринин ев дустаглығы илә әвәз олунмасыны истәјирәм».
Сөз дөвләт иттиһамчысына верилди. О, вәсатәтләрин мүдафиә характери дашыдығыны билдирәрәк, әсассыз олдуғуну деди.
5 дәгигәлик фасиләдән сонра һаким вәсатәтин тәмин олунмадығыны билдирәрәк, нөвбәти мәһкәмәнин декабрын 1-и, саат 15.00- а тәјин олундуғуну деди.
Диггәт: Хәбәрдән истифадә етдикдә мәнбәјә истинад лазымдыр
