Әһли Бејт -АБНА- хәбәр аҝентлијинин вердији хәбәрә әсасән: Сон ҝүнләр капиталист режимләрин халглары дахили проблемләрдән јајындырмаг мәгсәди илә сүни јолларла дүнјанын ҝүндәмини мәшғул едән јени бир пропаганда ортаја чыхыб. Гәрб мәтбуаты Ирана гаршы һәрби әмәлијјатларын башланылмасы үчүн АБШ, Инҝилтәрә вә Исраилин артыг һәрәкәтә кечидијини јазыб. Ҝүнүн әсас суалы да будур ки, ирана гаршы һәрби әмәлијјатлар һәјата кечириләҹәкми?
Шәрг-Гәрб Арашдырмалар мәркәзинин рәһбәри Әрәстун Оруҹлу бунунла бағлы дејир ки, апарылан тәһлилләр вә Иран әтрафында баш верәнләрин нәзәрдән кечирилмәси суала ҹаваб ахтарышында хејли пессимист олмаға әсас верир. «Амма ејни заманда белә бир мүдахиләнин олаҹағы тәгдирдә онун иримигјаслы бир һәрби әмәлијјат олаҹағыны да сөјләмәк дүзҝүн олмазды. Белә ки, бу дәфә реал мүһарыбә тәһдидләри әсасән Исраил тәрәфиндән ҝәлир вә Иранын, ҝуја ән јахын заманда бир нечә нүвә башлығы әлдә едә биләҹәји илә әсасландырылыр. Илк бахышдан Иранын нүвә силаһы әлдә етмәк ҹәһдинин Исраилдә ҹидди нараһатлыг доғурмасы анлашылан олса да, фикримизҹә, бу мәсәләнин јалныз бир, өзү дә даһа чох бәһанә тәрәфидир. Әслиндә исә мәсәләнин Исраилин вә Иранын дахили сијаси конјунктурасы контекстиндә нәзәрдән кечирилмәси дә мараглы оларды».
Оруҹлу дејир ки, бунун үчүн сон ҝәлишмәләрин хронолоҝијасы ҹидди тәһлил предмети ола биләр. О һесаб едир ки, бурадан мејдана чыхан амилләр суалын реал ҹавабыны тапмаға имкан верир. Мәркәз рәһбәри хүсусән дә Исраилин президенти Шимон Пересин ТВ-2 каналына мүсаһибәсинә диггәт јетирмәји мәгбул сајыр. «Переси нә иди бу бәјаната вадар едән? Белә гәнаәтә ҝәлмәк олар ки, бурада ики сәбәб мүмкүндүр: биринҹи, Перес Ирана гаршы һәрби әмәлијјатлара башлајаҹағы һалда Исраилин тәкләнмәсинин гаршысыны алмаг истәјирдисә, икинҹиси, мүмкүндүр ки, президент бунунла дүнјаја Исраил һөкумәтинин артыг мүһарибә гәрары вердијини чатдырмаг истәјирди вә дүнјаны бунун гаршысыны алмаг барәдә тәҹили мүзакирәләрә башламаға чағырырды».
Оруҹлу билдирир ки, ҝәлән илин март ајында Исраил Кнессетинә (парламентинә) кечириләҹәк нөвбәти сечкиләрин буҝүнкү Нетанјаһу-Либерман һакимијјәтинә уғур вәд етмәдији артыг бәллидир. «Радикал сијасәт хәттинә садиг олан бу коалисијанын гаршыдан ҝәлән сечкиләрдә вәзијјәти өз хејрынә һәлл етмәк үчүн Ирана һавадан зәрбәләр ендирәҹәји истисна едилмир. Диҝәр тәрәфдән, Әһмәдинежад һакимијјәтинин дә ҹидди дахили сосиал-игтисади вә сијаси проблемләри вар ки, бу да һәр ики өлкәнин һакимијјәтләри үчүн хариҹи дүшмән амилини һәјати зәрурәтә чевирир. Одур ки, мүһарыбәнын реал олдуғу бир заманда һәр ики өлкә рәсмиләринин тәһдидләри анлашыландыр».
Мәркәз рәһбәринин гәнаәти будур ки, јахын заманларда дүнја Исраил-Иран гаршыдурмасынын сөз савашындан һәрби әмәлијјатлара кечмәсинин шаһиди ола биләрик. «Исраилин Иранын нүвә објектләринә ендирәҹәји һава зәрбәләринә Иранын ҝенишмигјаслы ҹаваб вермәјәҹәјини дүшүнмәк дә садәлөвдлүк оларды. Амма һәрби әмәлијјатларын ҝениш вүсәт алаҹағы вә узанаҹағы да инандырыҹы ҝөрүнмүр, чүнки бу һалда Исраил һәм даһа дағыдыҹы силаһлардан истифадә етмәјә мәҹбур олуб ҹидди бејнәлхалг тәзјиглә үзләшә биләр, һәм дә Иранын ҹаваб зәрбәләри Исраилдә дахили сијаси дуруму мөвҹуд игтидар коалисијасынын әлејһинә дәјишә биләр. Одур ки, һәрби гаршыдурманын баш верәҹәји тәгдирдә, онун гысамүддәтли олмасы һәр ики тәрәфин еһтијаҹларына ҹаваб верир. Чүнки тәрәфләрин һәр икиси өлкәнин дахилинә һесабланмыш аддым атаҹаг».
Диггәт: Хәбәрдән истифадә етдикдә мәнбәјә истинад лазымдыр
