Әһли Бејт -АБНА- хәбәр аҝентлијинин вердији хәбәрә әсасән: “Азәрбајҹан Ислам Партијасынын офиси мәсәләси баш прокурор Закир Гараловун диггәтиндәдир”. Гәрарҝаһынын гајтарылмасы үчүн Республика Прокурорлуғуна ики дәфә јазылы мүраҹиәт едән АИП-ә белә бир шифаһи ҹаваб верилиб.
Партијанын мәтбуат хидмәтинин рәһбәри Ҹавид Ҹаббарлынын сөзләринә ҝөрә, прокурорлуғун дәфтәрханасындан дејибләр ки, октјабрын 13-дә тәгдим олунан икинҹи мүраҹиәтин (биринҹи мүраҹиәт сентјабрын 22-дә олмушду) үстү јазылараг Бакы Ағыр Ҹинајәтләр Мәһкәмәсинә ҝөндәрилиб: “Дәфтәрханадан ону да билдирдиләр ки, јахын ҝүнләрдә јазылы ҹаваб вериләҹәк”.
Азәрбајҹан Ислам Партијасынын Бакыда, Һидајәтзадә күчәси, 51-дә јерләшән гәрарҝаһы јанварын 13-дә Республика Прокурорлуғу әмәкдашларынын апардығы ахтарышдан сонра бағланыб. Ахтарышлар Ислам Партијасынын лидеринә вә функсионерләринә ачылан ҹинајәт иши илә бағлы олуб. Республика Прокурорлуғунун мүстәнтиги Меһди Мирзәјев о заман офисин бир нечә ҝүн бағлы галаҹағыны дејиб, анҹаг мәһдудијјәт бу ҝүнә гәдәр давам едир.
Бакы Ағыр Ҹинајәтләр Мәһкәмәси октјабрын 7-дә исламчыларын лидери Мөвсүм Сәмәдову вә даһа 5 нәфәри азадлыгдан мәһрум едиб.
Диггәт: Хәбәрдән истифадә етдикдә мәнбәјә истинад лазымдыр
