Әһли Бејт -АБНА- хәбәр аҝентлијинин вердији хәбәрә әсасән: Дәрманы һазырлајанлардан бири, Русија Елмләр Академијасынын мүхбир үзвү Серҝеј Радионов мәлумат вериб ки, онун һазырланмасына 1987-ҹи илдән башланылыб. Препарат артыг патентләшдирилиб вә 2012-ҹи илдән сатыша бурахылаҹаг.
"Дүнјада бу препаратын аналогу јохдур. О, вирусун јерләшдији һүҹејрәјә нүфуз едәрәк ону гандан јујуб чыхаран надир маддә олан алфа-фетопротеинә әсасланыр. Даһа сонра вирус әлејһинә препаратлар вирусун һүҹејрәсини тамамилә мәһв едир. Нәтиҹәдә хәстә һеч бир фәсад олмадан вә бир ај әрзиндә тамамилә сағалыр", - Радионов журналистләрә билдириб.
Алимин сөзләринә ҝөрә, мөвҹуд препаратлар азеффективдир, она ҝөрә дә онлар вирусун јерләшдији һүҹејрәјә нүфуз едә билмирләр. Белә дәрманларла һепатит C-нин бир курс мүалиҹәси бир ил чәкир.
Јени препарат сајәсиндә һепатит C-нин мүалиҹәсинин мүддәти 12, дәјәри исә 15 дәфә азалыр. Ејни заманда хәстә бу тәһлүкәли хәстәликдән там мүалиҹә олунур. Клиники сынаглар заманы тестдән кечирилән адамлардан бир нечәси һепатитлә јанашы, ИИВ-ә јолухмуш шәхсләр олублар. "Мүалиҹә курсу битдикдән сонра ганда иммун чатышмазлығы вирусу ашкар едилмәјиб", - алим дејиб.
Бу дәрманын әсасыны тәшкил едән алфа-фетопротеин маддәси васитәсилә онколожи хәстәликләрин еффектив мүалиҹәси үчүн јени дәрманын һазырланмасы да мүмкүндүр.
Хатырладаг ки, бу илин јазында мәлум олуб ки, јахын илләрдә АБШ-да һепатит C әлејһинә јени, ингилаби препарат мејдана чыха биләр. Илкин мәлуматлара ҝөрә, бу дәрманла гыса вахт әрзиндә бөјүк сајда пасијенти мүалиҹә етмәк мүмкүндүр. Онун јарадылмасы һепатит C вирусунун мүалиҹәси үчүн даһа јахшы дәрманын һазырланмасы истигамәтиндә апарылан 15 иллик тәдгигатларын кулиминасија нөгтәси олуб. Гејд едәк ки, дүнјада 170 милјона јахын инсан һепатит C вирусундан әзијјәт чәкир.
Һепатит C ган васитәсилә кечән, гараҹијәрин сиррозуна вә хәрчәнҝинә ҝәтириб чыхаран хәстәликдир. Вирус адәтән ијнә васитәсилә кечир. Надир һалларда исә ҹинси јолла да кечә билир. Хәстәлик тез-тез ганунсуз инексијаларын, о ҹүмләдән наркотикләрин истифадәси илә ассосиасија едилир.
Һепатит C вирусуна јолухмуш шәхсләр бундан узун мүддәт хәбәрсиз ола биләрләр. Хәстәлијин мөвҹудлуғу о заман мәлум олур ки, артыг гараҹијәрә дүзәлдилмәси мүмкүн олмајан зәрәр дәјир. Она ҝөрә дә һепатит C гараҹијәр көчүрүлмәсинин әсас сәбәбидир.
Диггәт: Хәбәрдән истифадә етдикдә мәнбәјә истинад лазымдыр
