Әһли Бејт -АБНА- хәбәр аҝентлијинин вердији хәбәрә әсасән: Октјабрын 20-дә иҹра апаратында партијанын сәдр әвәзи Елчин Манафовун, сәдрин биринҹи мүавини Ингилаб Әһәдлинин, сәдр мүавинләри Рөвшән Әһмәдовун вә Акиф Һејдәрлинин иштиракы илә топланты кечирилиб. Топлантыда Азәрбајҹан Ислам Партијасынын октјабрын 10-да Бакы Шәһәр Иҹра Һакимијјәтинә мүраҹиәтинә меријанын октјабрын 19-да вердији ҹаваб мүзакирә едилиб, бәјанат гәбул олунуб.
Акиф Һејдәрлинин вердији мәлумата ҝөрә, Бакы Шәһәр Иҹра Һакимијјәтинин ҹаваб мәктубунда дејилир ки, Азәрбајҹан Ислам Партијасынын үзвләринин иштиракы илә јарадылмыш тәшкилат комитәсинин митинг кечирмәк истәји “Сәрбәст топлашмаг” һаггында ганунун мүәјјән маддәләринә ҹаваб вермир: “Мәктубда билдирилир ки, тәшкилат комитәсинин тәклиф етдији күчә вә проспектләр нәглијјатын интенсив һәрәкәт етдији әразиләр олдуғундан һәмин јерләрдә аксија кечирилмәси мүмкүн дејил. Буна ҝөрә дә Бакы Шәһәр Иҹра Һакимијјәти планлашдырылмыш митингин кечирилмәсини мәгсәдәмүвафиг һесаб етмир”.
Буҝүнкү топлантыда Бакы Шәһәр Иҹра Һакимијјәтинин 19 октјабр тарихли мәктубуна ҹаваб верилиб: “Бизим ҹаваб мәктубумузда “Сәрбәст топлашмаг” һаггында ганунун мүәјјән бәндләринин позулмадығы билдирилиб, аксијанын митинг формасында кечирилмәси, онун јери, вахты, иштирак едә биләҹәк инсанларын сајы барәдә дәгиг мәлумат верилиб. Һәмчинин тәшәббүс групуна дахил олан шәхсләрин јашајыш үнванлары вә саирә мәлуматлар мәктубда гејд олунуб. Ҹаваб мәктубунда бир даһа вурғуланыб ки, тәшкилат комитәсинин аксија кечирмәк үчүн тәклиф етдији јерләр ганунла мүәјјән олунмуш әразиләрдир. Һәмчинин орада јазылмышды ки, һәмин јерләр мүвафиг билинмәсә, тәшкилат комитәси Бакы Шәһәр Иҹра Һакимијјәтинин өзүнүн тәклиф етдији алтернатив јердә дә митинг кечирмәјә һазырдыр”.
Акиф Һејдәрлинин сөзләринә ҝөрә, бүтүн бунлара бахмајараг Бакы Шәһәр Иҹра Һакимијјәти тәшкилат комитәсинин митинг кечирмәк истәјинә јох ҹаваб вериб: “Әлбәттә, биз буну илк нөвбәдә өлкә вәтәндашларынын конститусион һүгугларынын позулмасы кими гијмәтләндирир вә Бакы Шәһәр Иҹра Һакимијјәтинин һәмин гануну кобуд шәкилдә позмасы кими дәјәрләндиририк. Биз митингин мәгсәдини ајдын ҝөстәрмишик, меријанын реаксијасыны баша дүшүлмәјән һал кими гијмәтләндиририк. Бакы Шәһәр Иҹра Һакимијјәти халгыны севән, вәтәнпәрвәр, вәтән торпагларынын бүтөвлүјүнү истәјән, өлкәдә коррупсија вә рүшвәтхорлуг кими өлкә талејини зәрбә алтында гојан әламәтләрә гаршы мүбаризәјә јох дејир. Әҝәр беләдирсә, өлкә вәтәндашлары Бакы Шәһәр Иҹра Һакимијјәти илә артыг разылашдырылмыш дејил, разылашдырылмамыш митинг кечирмәк фикринә дүшсүнләр. Бу заман исә мүәјјән тәхрибатлар төрәдилсин, инсанлар тәзјигә вә тәсирә мәруз галсын”.
Топлантынын сон гәрары һаггында данышан Акиф Һејдәрли әлавә едиб ки, тәшкилат комитәси мәһкәмә јолу илә өз конститусион һүгугларынын бәрпасына чалышаҹаг: “Јахын мүддәтдә аидијјәти үзрә мәһкәмәләрә мүраҹиәт едәҹәјик вә Бакы Шәһәр Иҹра Һакимијјәтинин ганунсуз һәрәкәтләринә сон гојулмасы үчүн мүбаризәмизи давам етдирәҹәјик”.
Диггәт: Хәбәрдән истифадә етдикдә мәнбәјә истинад лазымдыр
