Әһли Бејт -АБНА- хәбәр аҝентлијинин вердији хәбәрә әсасән: “WikiLeaks” сајтынын АБШ дипломатларына аид Азәрбајҹанла бағлы телеграмларыны һиссә-һиссә дәрҹ етмәкдә давам едирик. Бунларын арасында АБШ сәфири Рино Һарнишин 2006-ҹы ил апрелин 24-дә ҝөндәрдији телеграмда Азәрбајҹанын Енерҝетика назири Натиг Әлијевлә ҝөрүшүн деталлары барәдә бәһс олунур.
Ән мараглысы исә сәфирлә ҝөрүшүн Дағлыг Гарабағ мүнагишәсинин тәнзимләнмәсинин мүзакирәсилә бағлы һиссәсиндә Н.Әлијевин мәсәләјә тамамлиә фәргли нөгтеји-нәзәрдән јанашмасы олуб. Сөһбәт заманы енерҝетика назири дөвләт башчысы Илһам Әлијевин мүһарибә бәјанатларынын әлејһинә ҝедәрәк бунун чох тәһлүкәли олмасына ишарә вуруб. Дөвләт Департаментинә ҝөндәрилән телеграмда дејилир: “Азәрбајҹанын енерҝетика назири Натиг Әлијевлә ҝөрүшдә сәфир Дағлыг Гарабағ мүнагишәси һагда сорушараг әлавә едиб ки, о, мөвзу илә бағлы олдугҹа агрессив риторика барәдә ешидәндә чох һәјәҹанланыр вә буну кифајәт гәдәр нараһатедиҹи һал һесаб едир. Әлијевсә ҹаваб олараг, тез-тез мүһарибә бәјанатлары илә чыхыш етмәјин чох пис идеја олдуғу илә разылашыб. Н.Әлијев һисс едир ки, Азәрбајҹан һөкумәти Дағлыг Гарабағ мүнагишәсинин сүлһ јолу илә һәлли истигамәтиндә риск етмәлидир. “Мүһарибә һәр шеји мәһв едә биләр” дејән Натиг Әлијев әлавә етди ки, дөјүш әмәлијјатларынын јениләнмәк рискинин олдуғу сон бир нечә ил әрзиндә Азәрбајҹан кифајәт гәдәр уғур әлдә едиб.
Диггәт: Хәбәрдән истифадә етдикдә мәнбәјә истинад лазымдыр
