Әһли Бејт -АБНА- хәбәр аҝентлијинин вердији хәбәрә әсасән: Асија Диалогу Ыҹтимаи Бирлијинин тәшкил етдији “Мави Мәрмәрә илә азадлыға” адлы бејнәлхалг тәдбир октјабрын 17-дә саат 11-дә “Park INN” отелиндә кечирилмәлијди. Лакин дүнән отелдән тәшкилатчыларла әлагә сахланылыб вә билдирилиб ки, “Мави Мәрмәрә” ҝәмисиндә баш верән олајлардан сонра ҝәрҝинләшән Түркијә-Исраил мүнасибәтләринә һәср едилән бу тәдбир баш тутмајаҹаг. Бу барәдә “Азадлыг”а мәлумат верән Асија Диалогу Иҹтимаи Бирлијинин рәһбәри Севил Нуријеванын сөзләринә ҝөрә, әлагә сахлајан шәхс буна сәбәб кими отелдә електрик хәтләринин партламасыны ҝөстәриб.
Тәдбирдә мүхтәлиф өлкәләрдән гонагларын иштиракыны вә баш верәнләрин хариҹи мәтбуатда мүзакирә мөвзусуна чеврилмәк еһтималыны нәзәрә алан тәшкилатчылар чыхыш јолуну башга бир мәкан тапмагда ҝөрүбләр. Дүнән “Авропа” отелилә разылыға ҝәлмәк мүмкүн олуб. Беләликлә, “Мави Мәрмәрә илә азадлыға” адлы тәдбир әввәлҹәдән планлашдырылдығы ҝүндә вә саатда, садәҹә, фәргли мәканда - “Авропа” отелиндә кечириләҹәк.
Севил Нуријева дејир ки, дүнән онлара “Park INN”дә тәдбирин баш тутмајаҹағы билдириләндә бу хәбәрә һәм тәәҹҹүбләниб, һәм дә јох. Танынмыш журналист ҝөстәрилән сәбәбин нә дәрәҹәдә реал олдуғуну өјрәнмәк мәгсәдилә өзү арашдырма апарыб. Амма мәлум олуб ки, “електрик хәтләринин партладығы” мәканда башга бир тәдбир кечирилир. Одур ки, Севил Нуријева бу мәсәләдә һансыса гүввәләрин әлинин олдуғуну истисна етмир.
“Һесаб едирәм ки, бу, бәзи мараглы гүввәләрин фәалијјәтинин нәтиҹәси ола биләр. Амма кимин? Неҹә? Бу барәдә јалныз еһтималларла данышмаг олар. Амма буну гәти шәкилдә дејә биләрәм ки, белә бир тәдбири позмаг ҹәһди бејнәлхалг сәвијјәдә Азәрбајҹанын әлејһинә јөнәлә биләрди. Бу позунту, манечилик нәтиҹәсиндә тәдбир үмумијјәтлә тәхирә салынсајды, һеч шүбһәсиз ки, баш верәнләр Түркијә вә диҝәр өлкәләрин мәтбуатында мүзакирә мөвзусуна чевриләҹәкди, мүхтәлиф нәтиҹәләр чыхарылаҹагды. Сон нәтиҹәдә дә бүтүн бунлар Азәрбајҹанын әлејһинә јөнәләҹәкди. Бүтүн бунларын гаршысыны алмаг үчүн тәләсик Авропа отелилә проблеми јолуна гојмаға чалышдыг вә чох јахшы ки, буна наил олдуг”, - дејә Севил Нуријева билдириб.
Ону да гејд едәк ки, тәшкилатчылар онлары чәтин вәзијјәтдә гојан “Park INN” отелиндән компенсасија тәләб едәҹәк: “Чүнки он ҝүн әввәл бизимлә мүгавилә бағланыб, дәвәтнамәләр һазырланыб, пајланылыб. Бу ҝүн (дүнән-ред.), өзү дә иш ҝүнүнүн битмәсинә аз галмыш зәнҝ еләјирләр ки, алынмајаҹаг. Белә бир ҹидди бејнәлхалг тәдбир аз гала, онларын үзүндән позулаҹагды”.
Диггәт: Хәбәрдән истифадә етдикдә мәнбәјә истинад лазымдыр
