Әһли Бејт -АБНА- хәбәр аҝентлијинин вердији хәбәрә әсасән: Иран Ислам Республикасы Һәрби Дәниз Гүввәләринин команданы Һәбибулла Сәјјари Атлантик океанына вә АБШ-ын дәниз сәрһәдләринин јахынлығына һәрби ҝәми ҝөндәрәҹәкләрини билдириб.
Һәбибулла Сәјјари дејиб: “АБШ бизим дәниз сәрһәдләримизин јахынлығында фәал олдуғу кими биз дә “Вәлији-фәгиһ”ә (Дүнја Мүсәлманларынын Лидери Ајәтуллаһ Әли Хамнеји һәзрәтләринә) садиг әсҝәрләримизин јардымы илә там ҝүҹүмүзлә АБШ-ын дәниз сәрһәдләринин јахынлығына һәрби ҝәмиләр ҝөндәрәҹәк, орада фәал олаҹағыг.
Иранын Һәрби Дәниз Гүввәләринин сәрбәст суларда олмасы мәсәләси бунунла битмир. Биз бүтүн сәрбәст сулара һәрби ҝәмиләр ҝөндәриб орада фәаллашмалыјыг”.
Иранын Атлантик океанына һәрби ҝәми ҝөндәрәҹәјини бир нечә ҝүн әввәл Иран Силаһлы Гүввәләринин баш гәрарҝаһ рәисинин ҹанишини Гуламәли Рәшид дә демишди. О, фикрини белә әсасландырмышды: “Ҝүҹлү бир дәниз гүввәсинин јарадылмасы дөјүш мәнтәгәсинин дүшмәнин әразисинә гәдәр ҝенишләндирилмәсинә тәсири ола биләр. Елә буна ҝөрә дә һесаб едирәм ки, һәр бир өлкә өз һәдәфләрини изләмәк үчүн, һәрби саһәдә олса белә, ајры-ајры һөкумәтләрә манеә јаратмадан сәрбәст сулардан вә дәнизләрдән јарарлана биләр. Беләликлә дә биз АБШ саһилләринин 12 милинә гәдәр ҝедә биләрик”.
Диггәт: Хәбәрдән истифадә етдикдә мәнбәјә истинад лазымдыр
