Әһли Бејт -АБНА- хәбәр аҝентлијинин вердији хәбәрә әсасән:
Һүгуг мүдафиәчиси билдириб ки, бир нечә ҝүн өнҹә 14 сајлы ҹәзачәкмә мүәссисәсиндә мониторинг заманы белә факт ашкар едиб: “Мәлум олду ки, орада намаз гылмаг үчүн мәһбуслардан јашадыглары јерин мәсҹидиндән арајыш тәләб олунур. Моллалар баша дүшә билмирләр ки, нә арајышы вермәлидирләр. Бәзи мәһкумлар тәләб олунан белә бир арајышы ҹәзачәкмә мүәссисәсинин рәһбәрлијинә тәгдим едибләр. Бәзи диндар мәһкумлар исә бунун әлејһинәдирләр. Гејд олунан арајышы тәгдим едәнләрә ибадәт етмәләринә шәраит јарадылыр. Чох мараглыдыр, тәләб олунан бу арајыш нә ҹүр тәгдим олунмалыдыр вә неҹә јазылмалыдыр? Һесаб едирәм ки, ҹәзачәкмә мүәссисәсиндә ибадәт етмәк, намаз гылмаг үчүн арајыш тәләб етмәк абсурддур. Елә инсан вар ки, һәбс олунандан сонра ибадәт етмәк фикринә дүшүб. Белә олан һалда о, неҹә јашадығы јердә јерләшән мәсҹиддән арајыш алмалыдыр?”И.Ҹавадова билдириб ки, бу мәсәлә илә бағлы әдлијјә назири Фикрәт Мәммәдова мүраҹиәт едәҹәк.
Пенитенсиар Хидмәтин мәтбуат хидмәтинин рәһбәри Меһман Садыгов исә мәһкумлардан белә бир арајышын тәләб олунмадығыны деди. О, ҹәзачәкмә мүәссисәләриндә ибадәт јерләри тикилдијини дә билдирди.
ДЕВАММ сәдри Һаҹы Илгар Ибраһимоғлу бунунла әлагәдар билдирмишдир: "Әҝәр белә бир һал јер алыбса - бу, абсурд сәҹијјә дашымагла јанашы, инсан һагларынын кобуд сурәтдә позулмасыдыр. Әввәла, Конститусијамыза ҝөрә, һеч кәс дини етигады илә бағлы мәлумат вермәјә мәҹбур едилә билмәз. Икинҹиси, ибадәт етмәк барәдә арајыш затән мүмкүн олмајан бир мәсәләдир - бу, садәҹә, инсанла Јарадан арасында олан бир мөвзуја мәмур дәхаләтидир. Вә һәр бир һалда, инсанын ибадәт етмәсинә һәр һансы манеә төрәтмәк - гүввәдә олан ганунвериҹилијин кобуд сурәтдә позулмасыдыр. Биз әлагәдар гурумлара бу проблеми тәҹили һәлл етмәк, инсан һагларыны позан мәмурлар барәсиндә хидмәти тәһгигат башлатмагла бағлы мүраҹиәт едирик".
Диггәт: Хәбәрдән истифадә етдикдә мәнбәјә истинад лазымдыр
