Рәһман вә Рәһим Аллаһын ады илә
Әһалиси 9 милјон нәфәри адламагда олан Мүсәлман Азәрбајҹанымыз һәр заман севҝили Ислам Пејғәмбәринин (с) ики әманәтинә - Гуран вә Әһли-бејтә (ә) сајғылы олуб. Артыг үзүҹү тарихә чеврилмиш вә динә гојдуғу сәрт гадағаларла јадда галмыш мәнфур совет режиминин 70 иллик һакимијјәти дөврүндә дә бу халг дини инанҹыны ҹаны вә ганы баһасына һифз едиб. Нәҹәфи-әшрәфдә вә башга елм оҹагларында јүксәк алимлик дәрәҹәси алмыш руһаниләримизи гәтлиам етсәләр дә, Азәрбајҹан халгы дини дәјәрләрә садиг галыб, дини бајрам вә әзаларда пәнҹәрәләрә гара пәрдә чәкиб, мәрасимләр кечириб.
Артыг о зүлмәт әсри баша чатыб. Инди Азәрбајҹан Республикасынын ән уҹгар кәндләриндә һәмвәтәнләримиз мәсҹидләрдә ибадәт едиб, мәдрәсәләрдә тәһсил алыр, һүсејнијјәләрдә әзадарлыг кечирирләр. Әлбәттә ки, 70 илин аб-һавасындан бирдәфәјә чыхмаг олмур. Һазырда динлә бағлы мүәјјән мәһдудијјәтләр олса да, кечмишлә мүгајисәјә ҝәлмәз вә мүсәлманлар бу ҝүнкү азадлыглара шүкүр етмәлидирләр.
Тарихән Азәрбајҹан халгы үчүн Нәҹәфи-әшрәф, Мәшһәди-Мүгәддәс, Мәсумеји-Гум дини елм оҹағы олуб вә бу шиә елм һөвзәләриндә бөјүк дин алимләри әрсәјә ҝәлиб. Аллаһ Ислам динини бәшәријјәт үчүн сон дин олараг бәјәндији кими, Һәзрәт Мәһәммәд (с) дә сон пејғәмбәр олараг өзүндән сонра үчүн дин алимләринин јүксәк мәгамыны јада салыб. "Пәрвәрдиҝара, мәним ҹанишинләрими бағышла!" – бујурдуғу заман «ја Рәсуләллаһ, сизин ҹанишинләриниз кимдир?» - сорушдулар. Бујурду: "О кәсләрдир ки, мәндән сонра ҝәлиб мәним сөзләрими вә сүннәми рәвајәт едәрләр!"
Мүасир Ислам дүнјасында ән мәшһур дин алимләриндән бири дә сојдашымыз, Әрдәбил шәһәринин имам-ҹүмәси Һөҹҹәтүл-ислам вәл-мүслимин ҹәнаб Сејид Һәсән Амилидир.
Һөҹҹәтүл-ислам вәл-мүслимин ҹәнаб Сејид Һәсән Амили һиҹри-шәмси 1341-ҹи илдә (милади 1961) хордад ајынын 15-дә Әрдәбилин гәдим Мәһәммәдијјә мәһәлләсиндә, мәнтәгәнин Ҹәбәл Амил сејидләриндән олан һөрмәтли аиләләриндән бириндә дүнјаја ҝөз ачыб. Сејид Һәсән ушаглыг дөврүнү баша вурдугдан сонра диндар аиләнин әнәнәләринә ујғун олараг Ҹәфәрији-Ислами мәдрәсәсинә ҝедиб. Ибтидаи тәһсилини бу мәдрәсәдә алыб. Ҝәнҹлик дөврүндә мәшһур хәтибләрин моизәләриндә, тәфсир дәрсләриндә иштирак едиб.
Әҹдадларынын јолуну ҝедәрәк руһани олмаг дүшүнҹәси онун Гума ҝәлиши илә нәтиҹәләниб. Устад Шәрһи-лүмәтејни мәрһум Иштиһарди, Расти Кашани, Үсули-фигһи устад Салеһинин һүзурунда охујуб. Сәтһ һиссәсини Ајәтуллаһ Пајани, Ајәтуллаһ Етимади вә Ајәтуллаһ Мүдәррисидән кәсб едиб. Фигһ хариҹ дәсрләрини Ајәтуллаһ Мәкарим Ширази, Үсул хариҹ дәрсләрини Ајәтуллаһ Ҹәфәр Сүбһанинин һүзурунда өјрәниб. Бир мүддәт дә мәрһум Ајәтуллаһ Фазил Ләнкәранинин фигһ хариҹ дәрсләриндән бәһрәләниб. 8 ил Ајәтуллаһ Вәһид Хорасани, Ајәтуллаһ Шејх Ҹәвад Тәбризинин дәрсләриндә олуб. Ејни заманда Ајәтуллаһ Ҹәвади Амолинин тәфсир дәрсләриндән бәһрәләниб. Устад Мәзаһири, мәрһум Иштиһарди, Әһмәди Мијанәҹи вә Пәһләванинин бәрәкәтли әхлаг дәрсләринә гатылыб.
Һөвзә дәрсләри илә јанашы университетдә тәһсил алыб, Теһран университетинин өлкә үзрә биринҹи дипломуна лајиг ҝөрүлүб. “Әгд вә шәртин гаршылыглы тәсири” мөвзусунда докторлуг ишини мүдафиә едиб, докторлуг дәрәҹәсинә чатыб.
Әрдәбилин мәрһум имам-ҹүмәси Ајәтуллаһ Мүрәввиҹ дүнјасыны дәјишдикдән сонра халг Ајәтуллаһ Мусәви Әрдәбили, Ајәтуллаһ Мишкини кими бөјүк шәхсијјәтләрдән ҝөзләјирди ки, бу мәсулијјәтли мәгама лајигли бир инсан тәјин едиләҹәк. Беләҹә, һөҹҹәтүл-ислам вәл-мүслимин һаҹы сејид Һәсән Амили һәмин мәгама тәклиф олунуб.
Хибрә мәҹлисинә сечилмәк үчүн намизәдин иҹтиһад дәрәҹәсиндә олмасы да шәртдир. Сејид Һәсән елми дәрәҹәси вә халгын әксәријјәт рәји илә бу мәҹлисин үзвү сечилиб.
Oну Азәрбајҹанда танымајан, аловлу чыхышларыны изләмәјән јохдур. Аллаһы севәнләр онун тәблиғатчыларыны да севир. Бакы, Сумгајыт, Ҝәнҹә, Ләнкәран вә башга шәһәрләрдә, еләҹә дә әјаләтләрдә Ҹәнаб Амилининин дини чыхышларыны ешитмәјән диндар тапмаг чәтиндир. Бу ҝүнә кими Устадын сөһбәтләри CD-ләр шәклиндә јајылыб. Амма интернет дөврүнүн өз тәләбләри вар. Узун илләрди Ҹәнаб Амили илә шәхси ҝөрүшләрдә вә онун даролерсһад.орҝ сајтына үнванланан чохсајлы мәктубларда бөјүк Ислам алиминин дәјәрли әхлаги-ирфани сајтынын азәрбајҹан дилли версијасыны јаратмаг хаһиш едилирди.
Бу хаһишләри нәзәрә алан Ҹәнаб Амили хүсуси јарадыҹы вә техники һејәтә азәри дилли веб-сәһифәнин һазырламасына иҹазә верди. Мүһәндисләр, дизајнерләр, тәрҹүмәчиләрдән ибарәт һејәт ишә башлады.
Нәһајәт, Азәрбајҹан халгынын интизарында олдуғу ҝүн ҝәлиб чатды. Һөҹҹәтүл-ислам вәл-мүслимин ҹәнаб Сејид Һәсән Амилинин азәри түркҹәсиндә веб-сәһифәси сынаг фәалијјәтинә башлады. Бу сынаг (тест) дөврүндә истифадәчиләрин активлији олдугҹа зәруридир. Башланғыҹда нәзәрдән гачан нөгтәләр, әдәби вә техники нөгсанларын олмасы тәбиидир. Јарадыҹы һејәт бүтүн ирад вә тәклифләринизә диггәтлә јанашаҹаг, мүвафиг јерләрдә ислаһат ишләри апарылаҹаг.
Һөҹҹәтүл-ислам вәл-мүслимин ҹәнаб Сејид Һәсән Амилинин азәри түркҹәсиндә веб-сәһифәси иҹтимаи-сијаси јох, әхлаги-ирфани јөнлүдүр. Бу сајтын мәһз сејр-сүлук, нәфсин тәрбијәси јолунда сизә бәләдчи олмасы нәзәрдә тутулур.
Seyidamili.com веб-сајтынын јарадыҹы һејәти
Диггәт: Хәбәрдән истифадә етдикдә мәнбәјә истинад лазымдыр
