Әһли Бејт -АБНА- хәбәр аҝентлијинин вердији хәбәрә әсасән: Милли.аз порталынын вердији хәбәрдә билдирилир ки, Тәһсил Назирлијинин шөбә мүдири Ајдын Әһмәдов Дини Етигад вә Виҹдан Азадлыгларыны Мүдафиә Мәркәзинин (ДЕВАММ) орта мәктәбләрдә һиҹаб гадағасыны ләғв етмәк үчүн апардығы кампанијаја мүнасибәт билдирәркән “Орта мәктәб шаҝирдләринин дәрсә һансы формада ҝәлмәсини һәр һансы груп вә һәрәкат мүәјјән етмир. Бу, ганунла мүәјјән олунур” кими чәтин анлашылан фикир билдириб.
Онун сөзләринә ҝөрә, “Тәһсил һаггында” гануна, ејни заманда, Назирләр Кабинетинин тәсдигләдији “Үмумтәһсил мәктәбләринин нүмунәви низамнамәси”нә әсасән, шаҝирдләрин ҝејим формасы мәктәбләрин али органы, јәни Педагожи Шура тәрәфиндән мүзакирә олунур вә һәлл олунур.
“Әввәлләр һәмишә журналистләр вә иҹтимаијјәт нүмајәндәләри назирлик гаршысында мәсәлә галдырарды ки, нијә мәктәбли формасы тәтбиг олунмур. Инди артыг мәктәбли формасы тәтбиг олунуб. Мәктәбли формасынын тәтбиги һаггында тәһсил назиринин әмри дә белә олду ки, бу мәсәлә билаваситә валидејнләр, јухары синиф шаҝирдләри, мәктәб коллективи, иҹтимаијјәт нүмајәндәләринин рәји, бирҝә мәсләһәтләшмәси нәтиҹәсиндә һәлл олунсун. Биз тәрәфдарыјыг ки, шаҝирдләр ејни ҝејим формасында мәктәбә ҝәлсинләр. Низамнамәнин 1.8-ҹи маддәсиндә дә гејд олунуб ки, шаҝирдләрин ҝејим формасы һәр бир мәктәбин өз низамнамәси илә мүәјјән олунур. Азәрбајҹан дүнјәви дөвләтдир. Шаҝирдләр дә гануна ујғун олараг, мәктәбә ваһид ҝејим формасында ҝәлмәлидирләр”, - Ајдын Әһмәдов дејиб.
Назирлик рәсмиси билдириб ки, мүәјјән рајонларда һиҹабла дәрсә ҝәлән шаҝирдләр вар. Амма үмумиликдә өлкәнин орта мәктәбләриндә белә шаҝирдләрин сајы һәддиндән артыг аздыр.
Нөвбәти тәдрис илиндә һиҹаб тахан шаҝирдләрин дәрсә һиҹабсыз ҝәлмәси үчүн ҝөрүлән тәдбирләрә ҝәлдикдә, Ајдын Әһмәдов дејиб ки, бунунла бағлы мүәјјән ишләр ҝөрүлүр. Рајон тәһсил шөбәләри вә диҝәр аидијјәти шәхсләр тәрәфиндән мүәјјән тәблиғат ишләри апарылыр вә валидејнләрә бу мәсәлә илә бағлы мөвҹуд ганунвериҹилик изаһ едилир.
“Амма һиҹаба ҝөрә шаҝирдләри мәктәбә бурахмамаг, дәрсдән кәнарлашдырмаг сөһбәти јохдур. Садәҹә олараг, бу мәсәлә илә бағлы мөвҹуд ганунвериҹилик ҹамаата изаһ олунур”, - Әһмәдов сөјләјиб.
О, дејиб ки, мүәјјән валидејнләр ушагларынын дәрсә һиҹабла ҝетмәләрини әсасландырмаға чалышырлар. Амма мәлум олур ки, һиҹаб тахмаг шаҝирддән дејил, валидејндән асылыдыр.
“I синфә ҝедән ушаг һеч һиҹабын маһијјәтини баша дүшмүр. Һиҹаб тахмаг мүәјјән валидејнләрин өз ушагларыны бу мәсәләјә табе етдирмәк истәјиндән ирәли ҝәлир. Амма әлимиздә ганун вар. Һамымыз да о гануна табејик. Мәктәб өзү, өз низамнамәси илә буну һәлл едир”, - Ајдын Әһмәдов билдириб.
Дини Етигад вә Виҹдан Азадлыгларыны Мүдафиә Мәркәзи орта мәктәбләрдә һиҹаб гадағасыны ләғв етмәк үчүн мүраҹиәт кампанијасы апарыб. Бу кампанија чәрчивәсиндә Азәрбајҹан вәтәндашларындан 100 миндән артыг имза топланыб. Мүраҹиәтә гошуланлар арасында бир сыра танынмыш шәхсләр дә вар. (Милли.Аз)
Бунунла бағлы ДЕВАММ сәдри Һаҹы Илгар Ибраһимоғлудан шәрһ алдыг. Һаҹы Илгар билдирди ки, Мәркәз бу тәшәббүсү ирәли сүрәндә, буну назирлијә дејил, дөвләт башчысына мүраҹиәт форматында едиб: "Бундан әлавә, һәдәф мәһз проблемин һәллидир. Проблеми ҝөрмәмәјә чалышмаг - чыхыш јолу дејил. Әфсус ки, Тәһсил Назирлији дини етигад азадлығынын позулмасыны "изаһат иши", "маарифләндирмә" кими ифадәләрлә пәрдәләјир. Биз чох аҹыјырыг ки, һөрмәтли Тәһсил Назирлији сәј вә баҹарыгларыны тәһсилин сәвијјәсинин артырылмасына, мәктәбләрин мүасир стандартлара ујғун һала ҝәтирилмәсинә дејил, етигадына риајәт едән инсанлары етигаддан дөндәрмәјә сәрф едир".
ДЕВАММ сәдри "дүнјәвилик" мәфһуму илә бағлы мәсәләјә дә ајдынлыг ҝәтирди: "Һүгугшүнаслар, нәзәријјәчиләр, һүгуг мүдафиәчиләри, дүнја сәвијјәли експертләр "дүнјәвилик" барәдә ајдынлыг ҝәтирмәкдән јорулду, амма һөрмәтли мәмурларымыз бу мәфһуму тәһриф етмәкдән јорулмады. Артыг нечә дәфә изаһ едилиб ки, дүнјәвилик - илк нөвбәдә инсан һаглары вә азадлыгларынын горунмасыны еһтива едир, бејнәлхалг-һүгуги сәнәдләрлә тәсбит едәб һаглары өлкә ганунвериҹилијиндә әксини тапмасы илә характеризә олунур. Мәһз елә дүнјәвилик шаҝирдләрин һиҹаб азадлығынын горунмасыны тәмин едир. Мәһз елә дүнјәвилик инсан һагларынын үмдә ролуну өнә чәкир. Мәһз елә дүнјәвилик принсипинә ҝөрә тәһсил мәмурлары һиҹаблы шаҝирдләри дәрсә бурахмаја билмәзләр. Мәһз елә дүнјәвилијә ҝөрә низамнамәләрә инсан һагларыны позан мүддәалар дахил едилә билинмәз. Әфсус ки, бу категоријалар олдуғу кими гәбул едилмир, фәрдләрин истәдији кими һалландырылыр".
Һаҹы Илгар Ибраһимоғлу бир даһа "Јүзминлик мүраҹиәт"ин һәдәфләринә тохунду: "Бу, гајәси парчаланмагдан гуртулмаг олан, бирләшдирмәк олан, вәһдәтә ҝәтирән бир тәшәббүсдүр. Һәр кәсә ајдындыр ки, 100 000 имза - 500 мин, 1 милјон, бәлкә дә даһа чох рәј демәкдир. Бу имзаларын өзү - ҹәмијјәтдә бирлијә, вәһдәтә, дөвләтчилијин мөһкәмләнмәсинә хидмәт едән амилдир. Савадсыз аналар һеч бир ҹәмијјәти инкишафа апармаз. Әгидәсиндән имтинаја мәҹбур етмәк - һеч бир топлума башуҹалығы ҝәтирмәз. Диндарлары марҝиналлашдырмаг ҹәһди - чох зәрәрли бир тенденсијадыр. Бу кампанија мәһз бүтүн бу проблемләри көклү һәлл етмәк, ҹәмијјәтдә, сүлһү, разылығы, барышығы, әмин-аманлығы бәргәрар етмәк нијјәти ҝүдүр. Иншааллаһ ки, артыг бөјүк бир һәдәфә чатылыб - проблемләри елликлә чөзмәк әнәнәләри бәрпа едилмәкдәдир. Уҹа Аллаһын лүтфү илә, тәшәббүс әсас һәдәфинә дә јетишәр, Азәрбајҹанымызын гызлары тәдрисдән кәнарда галмаз. Үмид едирик ки, үзүмүзә ҝәлән мүбарәк Рамазан ајы өзү илә бу проблемин һәлли мүждәсини дә ҝәтирәҹәк, мәһбусларын да азадлыға чыхмасына сәбәб олаҹаг".
Диггәт: Хәбәрдән истифадә етдикдә мәнбәјә истинад лазымдыр
