Әһли Бејт -АБНА- хәбәр аҝентлијинин вердији хәбәрә әсасән: “Ермәнистан президенти әһалинин диггәтини дахили проблемләрдән јајындырмаг үчүн Азәрбајҹанла һәрби мүнагишә јарада биләр”. Түркијәли журналистләрә мүсаһибәсиндә хариҹи ишләр назиринин мүавини Араз Әзимов белә дејиб.
“Туран”ын мәлуматына ҝөрә, Араз Әзимов Ермәнистан президенти Серж Сәркисјанын мүхалифәтин бөјүк тәзјиги алтында олдуғуну вурғулајыб: “Азәрбајҹанла мүнагишә јаратмаға мүвәффәг олса, о, хариҹдән јардым алаҹаг вә мүхалифәти дағыдаҹаг. Ҹәбһә хәттиндә сон ҝәрҝинликләр мәһз бунунла изаһ олунур”.
Назир мүавини әлавә едиб ки, мүһарибә башлајарса, Азәрбајҹан ордусу ишғал олунмуш әразиләри азад едәҹәк: “Бејнәлхалг һүгуг бизә өз әразимиздә антитеррор әмәлијјатлары һәјата кечирмәк үчүн ордудан истифадә һүгугу верир”.
Гарабағ данышыгларынын ҝедишини шәрһ верән Араз Әзимов дејиб ки, Јереванын проблемин һәллини ахтармагда мараглы олмадығы ҝетдикҹә даһа ајдын ҝөрүнүр: “Серж Сәркисјан әввәлләр әлдә едилмиш разылыглардан имтина едиб. 2004-2007-ҹи илләрдә белә олуб, өтән ил исә о, Минск групунун 2009-ҹу илдә Афинада тәклиф етдији јениләнмиш Мадрид принсипләрини гәбул етмәјиб. Инди Ермәнистан Лачын дәһлизинин деталларыны вә Азәрбајҹанын Ермәнистан әразиси үзәриндән Нахчыванла әлагәсинин мүзакирәсиндән имтина етди. О һәмчинин дејир ки, азәрбајҹанлылар Дағлыг Гарабағын јекун статусу мүәјјән едилмәдән өз евләринә гајыда билмәзләр”.
Дағлыг Гарабағын статусуна ҝәлинҹә, назир мүавини Азәрбајҹанын әрази бүтөвлүјү чәрчивәсиндә өзүнүидарә үчүн мүхтәлиф дүстурларын ола биләҹәјини вурғулајыб.
Араз Әзимов Русија вә Иранын Ермәнистана дәстәкләмәсиндән мәјуслуғуну да ҝизләмәјиб: “Русија Ермәнистан игтисадијјатынын 70 фаизинә нәзарәт едир. Онун сәрһәдләрини рус әсҝәрләри мүһафизә едир вә онлар ермәни ордусуна јардым едирләр, дејә о билдириб. Иран да Ермәнистанла исти мүнасибәтләр гуруб. Бу өлкә Түркијә кими Ермәнистанла сәрһәдләрини бағласа, Јереван Азәрбајҹанын ишғал едилмиш әразиләринин азад едилмәси мәсәләсиндә даһа үзүјола оларды”.
Диггәт: Хәбәрдән истифадә етдикдә мәнбәјә истинад лазымдыр
