Әһли Бејт -АБНА- хәбәр аҝентлијинин вердији хәбәрә әсасән: Һәмишәки кими Аллаһ нуруну ағызлары илә үфүрүб сөндүрмәк истәјән Аллаһсызлар нөбәти аддымларында “Һиҹаба Азадлыг” мүбаризәсини тушларына ҝәтирмишләр.
Дејерлер.орҝ јазыр:Бу ҝүнләрдә азтанынан мәтбу органларын бириндә "Азәрбајҹанда паниранизмин јени мәрһәләси" вә "Иран “һиҹаба дәстәк” кампанијасына..." башлыглы һиҹабла бағлы "Јүзминлик имза" кампанијасына гаршы јалан, тәһгир вә бөһтан үзәриндә гурулан силсилә јазылар дәрҹ олунмушдур. Бу јазыларда иҹтимаијјәт арасында чох гејри-ҹидди бир имиҹә малик олан "арашдырмачы", "Јүзминлик имза" кампанијасынын ҝуја һансыса кәнар сифаришләрлә апарылмасы, үмумиликдә һиҹаба дәстәк просесинин кәнардан малијјәләшән бир мөвзу олмасы барәдә тамамилә бөһтан вә тәһгир үзәриндә олан иддиалара јер вермиш, практики олараг өлкәнин дини ҹамиәсинин мүтләг әксәријјәтинин, о ҹүмләдән, исламјөнүмлү сајт вә гурумларынын хариҹин диктәси вә малијјәси илә ишләмәси барәдә ағласығмаз ифтиралар јағдырмышдыр.
Сөзүҝедән гарајахма јазысында өлкәнин иҹтимаи һәјатында фәал иштирак едән, һәр заман дөвләтчилик, һәгиги вәтәнпәрвәрлик, инсан һаглары, демократија, вәтәндаш ҹәмијјәти, сосиал проблемләр кими мөвзуларда дәгиг вә системли мөвге сәрҝиләјән, Гарабағ дәрдини һәр заман јашадан чохлу сајда гурумлар да тәһгир олунуб. О ҹүмләдән, ДЕВАММ кими тәшкилатлар да гарајаханын вә онун архасында дуран бәдхаһ нијјәтли анти-ислам гүввәләринин шәр-бөһтанындан кәнарда галмајыб.
Мөвзуну шәрһ етмәк үчүн ДЕВАММ сәдри Һаҹы Илгар Ибраһимоғлуја мүраҹиәт етдик. Һаҹы Илгар мөвзу илә бағлы шәрһиндә бунлары билдирди: "Әфсуслар олсун ки, заман-заман бәзи писнијјәтли фәрдләр ортаја чыхараг, тәһгир вә бөһтан фону јаратмагла хошмәрамлы тәшәббүсләрә манеә төрәтмәјә чалышырлар. Гыса бир мүддәт әрзиндә 80 миндән чох имза топланыб. Бу ишдә јүзләрлә көнүллү иштирак едир. Вәтәнини севән, инанҹына садиг олан, ихласлы, тәмәннасыз инсанлар ҝеҹә-ҝүндүз чалышырлар ки, һиҹаб проблеми өз һәллини тапсын. Ҝөз өнүндәдир ки, ҹәмијјәти пәрән-пәрән, дағылмыш ҝөрмәк истәјәнләрин, инанҹлыларын марҝиналлашмыш, јад, өзҝә дурумда галмагларыны, иҹтимаи һәјатдан тәҹрид олмагларыны истәјәнләрин планлары пуча чыхыр. Ҹәмијјәт инанҹлылара дәстәк верир, һиҹаб һүгугуна дәстәк верир, виҹдан азадлығына имза атыр. Тәбии ки, Азәрбајҹаны севмәјән гүввәләр бундан хошһал ола билмәзләр. Вә һәмишәки кими, "гара пиар" механизми ишә салыныр, тәһгир вә бөһтан үзәриндә гурулмуш, тамамилә ағ јаланлара сөјкәнән ҹызма-гаралар әрсәјә ҝәлир.
Мангуртлашмыш үнсүрләр, һәр заман бүтүн диҝәр инсанлары да өзләринин дурумунда ҝөрмәк истәјибләр. Дар пәнҹәрәдән дүнјаја бахмаг дурумундан кәнара чыха билмәјәнләр үчүн өлкәнин ишыглы үфүгләрини ҝөрә билмәмәк вә бу үфүгләр үчүн чалышмамаг һалы - тәбиидир. О да ајдындыр ки, пул-пара илә ишләмәјә вәрдиш едәнләр, диҝәр инсанлардан башга мотивасија ҝөзләмирләр. Онлар инанмырлар ки, кимсә әгидәјә, хош мәрама, мүсбәт дурум бәргәрар етмәк амалына сөјкәнән аддым ата билсин, өзү дә тәмәннасыз. Бу, онларын интеллектиндән вә дүнјаҝөрүшүндән кәнар бир јанашмадыр. Бунунла бәрабәр, мәшһурлашмаг, скандаллар вә сәс-күјлү олајлар фонунда ҝүндәмә ҝәлмәк истәји дә беләләрини һәрәкәтә ҝәтирән мотивләрдәндир.
Иншәаллаһ ки, бүтүн бу төрәтдикләри сифаришли вә бәдхаһ ишләр, өз саһибләринә рәзилликдән башга бир шеј ҝәтирмәјәҹәк. Исламла, инанҹла дүшмәнчилик едәнләр, инанҹлыларын кәнар сифаришләрлә һәрәкәт етмәкләри кими абсурд фикирләри иҹтимаијјәтә сырымаға ҹәһд едәнләр - ифша олунаҹаглар. Нечә илләрдир ки, заман-заман инанҹлылара гаршы гарајахма ҹәһдләри едилир, онлары ҹәмијјәтдән өзҝәләшдирмәк тәшәббүсләри ортаја атылыр. Амма бунлар һамысы хам хәјалдыр. Әслиндә, инанҹ әһлинә нөвбәти ҝөббелссајағы гарајахма ҹәһди, дәрҹ олунмамышдан артыг пуча чыхмышдыр.
Гәдирбилән халгымыз бу илләр әрзиндә һәр кәси чох ҝөзәл таныјыб, кимин нә иш саһиби олдуғуну да чох ҝөзәл билир. Уҹуз вә болшевиксајағы фәндләрлә халгы чашдырмаг мүмкүн дејил.
Уҹа Аллаһын лүтфүјлә, бу мүгәддәс мәрамлы тәшәббүс өз ҝөзәл сонуҹуна јетишәр, проблемләр чөзәр, һиҹаб мүсибәти дә, һиҹаб мәһбусларынын мүсибәти дә сона јетәр, иншәаллаһ. Халгымыз бу имтаһанлардан башыуҹа чыхар, иншәаллаһ!".
Мүсаһибәни апарды: Әбазәр Әһмәдли,
Диггәт: Хәбәрдән истифадә етдикдә мәнбәјә истинад лазымдыр
