Әһли Бејт -АБНА- хәбәр аҝентлијинин вердији хәбәрә әсасән: Антикоррупсија тәдбирләринин илк ҝүнләриндә бу кампанијаја илк дәстәк верән гурумлардан бири Дөвләт Ҝөмрүк Комитәси олса да, әслиндә диҝәр истигамәтләрдә олдуғу кими, бу гурумун да нүмајиш етдирдији давранышларын јалныз ҝөздән пәрдә асмаға хидмәт етдији һәр аддымда мәлум олур.
Мәсәлән, кечән ҝүнләрдә верилән мәлуматларда билдирилмишди ки, 1000 манат рүшвәтә ҝөрә, Ирандан Нахчывана кечмәк истәјән бир груп вәтәндаш ҝөмрүк мәнтәгәсинин ишчиләри тәрәфиндән 40 ҝүн әрзиндә ҝиров тутулуб. Јалныз јахынларынын ишә гарышмасы вә тәләб олунан рүшвәти өдәмәсиндән сонра ҝировлар азад едилиб.
Һалбуки ДҜК сәдри Ајдын Әлијев коррупсија илә мүбаризә апардыгларыны сүбута јетирмәк үчүн һәтта ҝөмрүкдән кечән малларын дөвләт рүсумларыны да рәсмән ачыглајараг, артыг рүшвәтин јығышдырылдығыны елан етмишди.
ПИА.АЗ-а едилән вәтәндаш мүраҹиәтләри дә тәсдигләјир ки, ДҜК системи јенә дә әввәлки гајдада рүшвәт адлы чиркабын бурулғанындадыр. Бу барәдә редаксијамыза дахил олан мүраҹиәтләрин бириндә дејилир:
«Бу ҝүнләрдә достларымла Руставидәки машын базарындан шәхси мәгсәдләр үчүн машын алдыг. Вә Азәрбајҹана дөнәркән ҝөмрүк ишчиләринин рүшвәт алмамасы илә бағлы дејиләнләрин јалан олдуғуна шаһидлик етдик».
Шикајәтчи билдирир ки, Ҝүрҹүстана аид ҝөмрүк-кечид мәнтәгәсиндә мүвафиг сәнәдләшмә үчүн ҹәми 3-4 дәгигә вахт итирсәләр дә, Азәрбајҹана аид әразидә 5 саат вахтлары алыныб:
«Бунлар бир јана. Рүсумда нәзәрдә тутулан 12 манат әвәзинә миник автомобилләри үчүн 30 манат, бөјүк машынлар үчүн 50-60 манат әлавә рүшвәт алыныр. Буна етираз етдикдә исә бланкы вәтәндашын үстүнә атырлар вә билдирирләр ки, ҝедиб банкда өдәјәк. Һалбуки, јахынлыгда банк мәнтәгәсинин олмадығыны вә ҝеҹә саат 12-дә һансыса банкын ишләмәдијини онлар да ҝөзәл билир».
Шикајәтчи билдирир ки, Азәрбајҹан ҝөмрүкчүләри һәтта Түркијә вәтәндашларындан да рүшвәт алырлар: «Камераларын олмасына бахмајараг, ачыг-ашкар рүшвәт алыныр. Кимсә нәзарәт етмир».
Гејд: Вәтәндашлардан хаиш олунур һәр кимин һансы грумла бағлы рүшвәт проблем оларса бизим сајтымызда ашағыдакы “сизин нәзәрләриз” гисминә јазсын биз дә халг күтләсин мәлуматландырарыг
Диггәт: Хәбәрдән истифадә етдикдә мәнбәјә истинад лазымдыр
