Әһли Бејт -АБНА- хәбәр аҝентлијинин вердији хәбәрә әсасән: Ијулун 18-и Ҝәнҹә Апеллјасија Мәһкәмәсиндә әлијевләрин репресијасына туш ҝәлмиш Һөҹҹәтул Ислам Һаҹы Азәр Ҹәбијевин шикајәтинә бахылыб. Вәкил Елчин Намазовун вердији мәлумата ҝөрә, һаким Ҹејһун Әһмәдовун һөкмү илә Азәр Ҹәбијевин иттиһам маддәси дәјишдирилиб.
Һөҹҹәтул Ислам Һаҹы Азәр Ҹәбијев Ҹинајәт Мәҹәлләсинин 221.2.2 маддәси илә (иҹтимаи гајданын горунмасы үзрә вәзифәни јеринә јетирән вә ја иҹтимаи гајданын позулмасынын гаршысыны алан һакимијјәт нүмајәндәсинә вә ја диҝәр шәхсә мүгавимәт ҝөстәрмәклә хулиганлыг) шәрләнәрәк 2 ил 6 ај мүддәтиндә азадлыгдан мәһрум едилиб.
Ҝәнҹәнин Низами Рајон Мәһкәмәси исә Азәр Ҹәбијеви Ҹинајәт Мәҹәлләсинин 221.3-ҹү маддәси илә (силаһдан вә ја силаһ гисминдә истифадә едилән әшјалары тәтбиг етмәклә хулиганлыг) шәрләјәрәк 4 ил мүддәтинә азадлыгдан мәһрум етмишди.
Вәкил Елчин Намазов Ҝәнҹә Апеллјасија Мәһкәмәсинин гәрарынын да ганунсуз олдуғуну гејд едиб: “Гәрар һәм дә әдаләтсиздир. Чүнки Ҹинајәт Мәҹәлләсинин 221.2.2 маддәсиндә һәбсә алтернатив ҹәза - 2 ил мүддәтиндә ислаһ ишләри дә нәзәрдә тутулур. Биз шикајәт верәркән Азәр Ҹәбијевә бәраәт истәмишдик вә бунун реаллашмасы үчүн бүтүн мүмкүн дәлилләри ортаја гојдуг. Амма мәһкәмә гәрәзли һөкм чыхарды. Гәрардан Али Мәһкәмәјә кассасија шикајәти вериләҹәк”.
ДЕВАММ сәдри Һаҹы Илгар Ибраһимоғлу мәсәләни шәрһ едәркән билдириб: "Әлбәттә ки, һөрмәтли илаһијјајчы Азәр Ҹәбијевин үзәриндән әсассыз маддәләрдән биринин ҝөтүрүлмәси - үмумиликдә мүсбәт һалдыр. Лакин, ДЕВАММ олараг, биз онун вә диҝәр илаһијјатчыларын, һәбс олунмуш диндарларын тамамилә азадлыға бурахылмаларыны, бәраәт алмаларыны истәјирик. Һәзрәт Пејғәмбәрин (с) мөвлудунда дөјүлүб һәбс едиләнләрин, мүхтәлиф илләрдә шәрләнәрәк тутуланларын, бу ил һәбс едилән Һаҹы Мөвсүм вә диҝәр АИП фәалларынын, Һаҹы Таленин вә митингә ҝөрә һәбс едилмиш диҝәр мәһбусларын вә бүтүн диҝәр илаһијјатчы вә диндарларын тезликлә азадлыға чыхмасыны истәјирик. Һесаб едирик ки, бунун үчүн бүтүн имканлар јараныб, мүбарәк Рамазан ајы јахынлашмагдадыр, шәфгәт вә мәрһәмәт јүклү Шәбан ајынын ҝүнләрини јашајырыг. Аллаһ Тәала тезликлә ҹәми мәһбусларын гапыларыны ачсын!".
Диггәт: Хәбәрдән истифадә етдикдә мәнбәјә истинад лазымдыр
