Әһли Бејт -АБНА- хәбәр аҝентлијинин вердији хәбәрә әсасән: Мәһкәмәнин һөкмү илә 6 ил мүддәтинә азадлыгдан мәһрум едилән Немәт Пәнаһлы јени бир “бомба” партлада биләр. Гардашы Сәмәд Пәнаһлынын сөзләринә ҝөрә, Н.Пәнаһлы она мәлум олан бүтүн сенсассион фактлары 24 саатлыг видеокасетдә јерләшдириб. Бир сутка камеранын өнүндә дајанараг бүтүн билдикләрини дилә ҝәтирән Немәт Пәнаһлы сонрадан касети бир нечә нәфәрә өтүрүб. Һәмин адамлар да Азәрбајҹанын хариҹиндә јашајырлар. Н.Пәнаһлы гардашына дејиб ки, ону һәбс јох, өлүмлә һәдәләјибләр. Әҝәр ону өлдүрәрләрсә, һәмин шәхсләр касети үзә чыхарыб јајаҹаглар. Сәмәд бәј дејир ки, бу мүдһиш касет орталыға чыхса, өлкәдә бөјүк сенсассија јарадаҹаг: “Деди ки, гардаш, мән 24 саат камеранын өнүндә отурмушам. Бүтүн билдикләрими данышмышам. Елә шејләрдир ки, мән онлары һеч јердә демәмишәм. Бу мәлуматлар ачылса, ҝөрәҹәксиниз ки, өлкәдә нәләр олаҹаг. Ону да деди ки, башыма бир иш ҝәлсә, бу мәлуматлар јајылаҹаг. О касет вар, амма мән онун кимләрдә олдуғуну билмирәм”.
Сәмәд Пәнаһлынын дедијинә ҝөрә, гардашы мәлум видеокасетдә елә шејләр ачыглајыб ки, онлар барәдә һеч китабында да һеч нә јазмајыб.
Буна гәдәр әсас версија о иди ки, Немәт Пәнаһлы һәлә чап олунмамыш 700 сәһифәлик китабынын ҝүдазына ҝедиб. 90-ҹы илләрин бир чох ҝизли олајларына, Н.Пәнаһлынын Һејдәр Әлијевлә мүнасибәтләринә һәср олунан китабын әлјазмалары һәлә ки, ҝизли сахланылыр. Һәбси заманы Н.Пәнаһлынын евинә ҝәлән шәхсләр бу ҝизли јазылары вә касети тәләб едибләр: “11 нәфәр ҝәлмишди. Дедиләр, истәмирсинизсә, еви алт-үст едәк, о касети вә китабы верин. Немәт бәјин компүтерини, јаддаш картларыны апардылар. Амма мән дејә биләрәм ки, ахтардыглары онларын ичиндә дејил. Немәт ушаг дејилди ки, онлары орталыгда сахласын. Сонрадан бизә ән мүхтәлиф васитәләрлә јол тапыб китабы әлдә етмәјә чалышдылар. Мәним ән јахын достум тәклиф етди ки, о китабы вер, бу јолла һакимијјәтә тәзјиг едиб Немәти хилас едәк. Сонрадан мәлум олду ки, о, һакимијјәтдә тәмсил олунан јүксәк вәзифәли бир шәхслә јахын мүнасибәтләрдәдир. Онун әли илә биздән нә исә өјрәнмәк истәјирләр. Мән дә Немәтин гардашыјам, о гәдәр ағылсыз дејиләм ки, һәр дејиләнә инаным”.
Дүнән Омбудсман әмәкдашларынын гардашы илә ҝөрүшдүјүнү дејән С.Пәнаһлы онларын полисдән дә, мүстәнтигдән дә ашағы сәвијјәдә һәрәкәт етдикләрини дејир: “Немәт тәҹридхана рәисинин она гаршы зоракылығына етираз олараг артыг 9 ҝүндүр аҹлыг едир. Мәним тәләбләримдән сонра Омбудсман һәбсханаја адамларыны ҝөндәрди. Ҝедиб марагланмајыблар ки, Немәт 9 ҝүндүр аҹлыг едир, она адиҹә һәким дә ајырмајыблар. Әвәзиндә утанмадан бөһтан атырлар ки, ҝуја Немәт тәҹридхана әмәкдашларына налајиг сөзләр дејиб. Нә ҝөзләјирдиләр? Рәис демәлијди ки, Немәти дөјмүшәм?! Тәҹридхана рәһбәрлији бир тәрәфдән Немәт бәјә, вәкилә миннәтчи дүшүр ки, дөјмә мәсәләсини бағлајаг, кеч ҝүнаһымыздан, бир дә белә шеј олмајаҹаг. О бири тәрәфдән дә белә бөһтан атырлар. Немәт бәј вәкилинә билдириб ки, рәис онун јанына ики мүавини илә ҝәлиб. Мүавинләри онун голларыны тутублар, рәис дә дөјүб. Дөјәндә дә дејиб ки, сән индијә кими совет һөкумәтини јыхдын, Мүтәллибову һакимијјәтдән апардын, филанкәсләрә буну етдин, инди ҝөр, сәнин башына нә ојун ачаҹам. Тәһдид едиб ки, барышыға ҝетмәсән, мәндән ора-бура шикајәт етсән, һәким чағырыб, сәни дәли кими гәләмә вериб, дәлиханаја салдыраҹам. Васиф Талыбовун Нахчыванда еләдикләрини бурада тәтбиг етмәк истәјир. Ахы Васиф Талыбов да сәсини чыхарданы, һаггыны тәләб едәни дәли адыјла диспансерә атдырыр”.
С.Пәнаһлы дүнән гардашынын һәбсханадан вәкил васитәсилә әризә ҝөндәрдијини, буҝүнләрдә бу барәдә мәтбуата ҝениш мәлумат верәҹәјини билдириб.
Хатырладаг ки, Н.Пәнаһлы Ҹинајәт Мәҹәлләсинин 221.3-ҹү (хулиганлыг, силаһдан вә ја силаһ гисминдә истифадә едилән әшјалары тәтбиг етмәклә төрәдилдикдә) маддәси илә иттиһам олунуб.
Диггәт: Хәбәрдән истифадә етдикдә мәнбәјә истинад лазымдыр
