“Мән 83 јашлы франсыз әсилли Ботто Жанн Ивонна 1947- ҹи илдә азәрбајҹанлы партизан, ҹәсур дөјүшчү Сәмәд Ширмәммәдовла аилә һәјаты гурараг Азәрбајҹана ҝәлмишик. Атам Италјан, анам исә франсыздыр. Гардашым Пол ҝенерал Шарл де Голун дәстәсиндә фашистләрә гаршы вурушуб. Анам истәмәсә дә мән Азәрбајҹана ҝәлин ҝәлдим. Јолдашым Сәмәд 1950- ҹи илдә вәфат етди. Оғлум Рафаелин онда 1 јашы вар иди. Сонра 1954- ҹү илдә мәним саһибсиз галмамағым үчүн гајыным Ширмәммәд мәни гәбул етди. Һазырда 7 өвладым, 30 нәвәм, 20 нәтиҹәм вар вә Имишли рајонунун Мурғузаллы кәндиндә јашајырам. Оғлум Әли Гарабағ дөјүшләриндә иштирак едиб вә мүһарибә ветереаныдыр”. Бу сөзләри франсалы гадын Ботто Жанн Ивонна (Ширмәммәдова) Азәрбајҹан республикасынын президенти Илһам Әлијевә вә Франсанын Азәрбајҹандакы сәфирлијинә јаздығы мәктубда гејд едиб. О, мәктубун сурәтини “Күр” Вәтәндаш Ҹәмијјәти Гәрарҝаһына ҝөндәрәрәк мүраҹиәтинин лазыми үнванлара чатдырылмасыны хаһиш едир.
Даһа сонра мәктубда дејилир; “Мөһтәрәм президент, 2010- ҹу илин сел дашгынлары вә грунт сулары евими јарасыз һала салыб. Ев чиј кәрпиҹдән олдуғундан өзүлү төкүлүб, евә иланлар долушур. Нәм, рүтубәт әлиндән евә ҝирмәк олмур. Евин бетону 2 јердән чатлајыб, ичәридә дә чатлар вар. Тәәссүф ки, сизин сел дашгынлары илә бағлы кечән ил имзаладығыныз мәшһур сәрәнҹамдан касыблар дејил, варлылар фајдаланды. Бу сәрәнҹамы өз мәмурларыныз белә нәзәрә алмыр вә бу мәмурлар өз вәзифәләриндән суи- истифадә едәрәк Имишлидә варлы, имканлы адамлара евләр тикибләр, мәним кими касыблар кәнарда галыб”.
Мәктубунда Ивонна ханым дөвләт башчысына онун проблемләринә диггәт ҝөстәрмәсини хаһиш етмәклә јанашы өмрүнүн сонунда Франсаја ҝетмәсинә јардымчы олмаға чағырыр; “Азәрбајҹан халгы гәдәр ҝөзәл, мәрһәмәтли халг дүнјада аздыр. Мәһз халгынызын бу ҝөзәл кејфијјәтләринә ҝөрә өмрүмүн 60 илини Азәрбајҹанда кечирмишәм вә буна чох шадам. Өмрүмүн сонунда вәтәнимә- Франсаја ҝедиб әзизләримин гәбрини зијарәт етмәк истәјирәм. Ејни заманда Франсаја сәфәрим заманы Гарабағын ермәниләр тәрәфиндән ишғал олундуғуну, бу барәдә билдијим һәгигәтләри өз гоһумларыма, халгыма вә дөвләтимә чатдырмаг истәјирәм”
Ивонна ханым мәктубунун сонунда дөвләт башчысыны вә франсанын Азәрбајҹандакы сәфирини евинә гонаг чағырыр вә Франсаја ҝетмәсинә көмәклик ҝөстәрилмәсини хаһиш едир.
