Әһли Бејт -АБНА- хәбәр аҝентлијинин вердији хәбәрә әсасән: Дини Гурумларла Иш үзрә Дөвләт Комитәсинин јаранмасынын 10-ҹу илдөнүмү илә бағлы кечирилән тәдбирдә чыхышында Гафгаз Мүсәлманлары Идарәсинин (ГМИ) сәдри Шејхүлислам Аллаһшүкүр Пашазадә дејиб: “Дини Гурумларла Иш үзрә Дөвләт Комитәсинә јени рәһбәр тәјин олунандан сонра комитә илә дини гурумлар арасында мүнасибәтләрин јени мәрһәләси башлады. Комитәнин әввәлки рәһбәри бу мүнасибәтләри јарада билмәди. Биз инди бу гурума чох архаланырыг”.
А. Пашазадә чыхышында ГМИ-јә гаршы дахилдә вә хариҹдә мүбаризә апарылдығыны да билдириб: “Дахилдән вә хариҹдән бизә гаршы мүбаризә апаранлар вар. Мүхтәлиф шајиәләр јајырлар. Бу мүбаризә елә Дини Гурумларла Иш үзрә Дөвләт Комитәсинә гаршы да апарылыр. Бу, Пејғәмбәрин дөврүндә дә олуб. Анҹаг Пејғәмбәр һаггын тәрәфиндә олдуғундан онларын өһдәсиндән ҝәлирди. Бизим дә инди архамызда һәм Аллаһ, һәм дөвләт, һәм дә Дини Гурумларла Иш үзрә Дөвләт Комитәси вар”.
Шејхүлислам Дөвләт Комитәсинин сәдри Һидајәт Оруҹовдан гардашлыг вә достлуг мүнасибәти ҝөрдүјүнү гејд едәрәк, буна ҝөрә она тәшәккүр едиб.
Диггәт: Хәбәрдән истифадә етдикдә мәнбәјә истинад лазымдыр
