Әһли Бејт -АБНА- хәбәр аҝентлијинин вердији хәбәрә әсасән: Ијунун 10-да Милли Мәҹлисдә “Дини етигад азадлығы һаггында” гануна дәјишикликләр мүзакирә олунан вахт чыхыш едән һаким Јени Азәрбајҹан Партијасы иҹра катибинин мүавини Сијавуз Новрузов билдириб ки, белә бир дәјишиклијин мүзакирәсинә “Әузу биллаһи мин әш-шејтани-р-рәҹим” сөзләри илә башламаг лазымдыр.
Сијавуш Новрузов дејиб ки, динин инсанлара чатдырылмасынын, тәблиғ олунмасынын бир нечә атрибуту вар, онлардан бири дә дин хадимләринин ҝејимидир: “Бу ҝүн Азәрбајҹанда униформа ҝејинмәјән идарә, тәшкилат, мүәссисә јохдур. Бәс нијә дини идарә вә тәшкилатларда бу гурумларын Азәрбајҹан халгына, ислам дәјәрләринә ујғун униформасы јохдур?
Мәсәлән, биз Иран моделини сечмишик. Амма Иранын тамам башга бир системи вар, Азәрбајҹанын башга. Иран диндары әммамә гојурса, биз гојмамалыјыг. Иран диндарлары гара ҝејинирсә, јашыл ҝејинирсә, биз бу системи тәтбиг етмәмәлијик. Азәрбајҹанда өзүмүзә ујғун форма сечилмәлидир. Сәлигәли-саһманлы.
Мәним чох һөрмәт бәсләдијим Һаҹы Сабир Һәсәнли бурада әјләшиб. О, Ислам Университетинин ректорудур. Бәјәм о, диндар дејил? Үзүндән нур јағыр. Ҝејим-кеҹими сәлигәли. Дин хадимләри тез-тез мәҹлисләрә ҝедирләр. Азәрбајҹан демократик, азад, мүасир дөвләтдир. Бу дөвләтдә дә бүтүн инсанларын ҝејим формасы мүәјјәнләшиб. Формада олмаг диндарын ҹәһәтләриндән биридир. Диндар формада олмалыдыр ки, апардығы мәҹлисдә она һөрмәт дә јарансын. Она ҝөрә дә диндарын униформасы мүәјјәнләшмәлидир вә мәҹлисләрә дә о формада ҝетмәлидир”.
Сијавуш Новрузов дәјишикликләрдәки бир мәсәләјә - “Гуран” курслары ачылмасынын мүвафиг иҹра структурлары илә бағлы олмасына тохунаркән вурғулајыб ки, бу дәјишиклик ислам дининә тамамилә зиддир: “Пејғәмбәримиз бујуруб ки, алимин мүрәккәби шәһид ганындан үстүндүр. Пејғәмбәримиз бујурур ки, бир адам ики адама јазыб-охумағы өјрәтсә, ону әсирликдән азад елә. Анҹаг бурада билдирилир ки, “Гуран” курсларынын ачылмасы мүвафиг иҹра структурлары илә бағлы олмалыдыр. Онда белә чыхыр Мисир Мәрданов да бу ҝүн сәрәнҹам вермәлидир ки, ријазијјат мүәллими ушаг ҝөтүрүб һазырлашдыра билмәз. Әҝәр киминсә габилијјәти варса, башгаларына “Гуран” өјрәдә билирсә - истәр евиндә, истәрсә дә башга јердә - буна нијә имкан верилмәмәлидир? Бу, маарифләндирмә ишидир вә онун гаршысыны алмаг олмаз. Она ҝөрә дә һесаб едирәм ки, “Дини етигад азадлығы һаггында” гануна едилән бу әлавә ислама зиддир. Мүвафиг иҹра структуру бу ишлә кимин мәшғул олаҹағыны мүәјјәнләшдирә биләр, амма гадаға гоја билмәз”.
Депутат дејиб ки, Азәрбајҹан Ҝүрҹүстан Мүсәлманлары Идарәсинин јарадылмасына сәрт реаксија вермәлидир: “Бу, сепаратчы бир аддымдыр, онун гаршысы алынмаса, Русијада, диҝәр јерләрдә дә белә аддымлар атыла биләр. Дост, гардаш һесаб етдијимиз Ҝүрҹүстан дөвләти белә сепаратчы јолла өзүнә иҹма јаратмамалыдыр”.
Диггәт: Хәбәрдән истифадә етдикдә мәнбәјә истинад лазымдыр
