Әһли Бејт -АБНА- хәбәр аҝентлијинин вердији хәбәрә әсасән: Зәрдабда аилә фаҹиәси баш вериб. Рајон Прокурорлуғундан верилән мәлумата ҝөрә, ики азјашлы баҹынын әјләнҹәси фаҹиә илә нәтиҹәләниб.
Рајонун Көрпүкәнд кәнди әразисиндә евдә ики баҹы - 6 јашлы Самирә Ибраһимова вә 4 јашлы Хәдиҹә ојнајаркән һәшәратлары мәһв едән “дихлофос” мәһлулуну бир-биринин үстүнә чиләјибләр. Кимјәви мәһлул һәр ики баҹыны зәһәрләјиб. Өвладларыны һушсуз вәзијјәтдә ашкарлајан валидејнләр онлары тәҹили хәстәханаја чатдырыблар. Һәкимләрин сәјинә бахмајараг, Хәдиҹәнин һәјатыны хилас етмәк мүмкүн олмајыб. Самирәнин вәзијјәти ағыр олдуғу үчүн Бакыја ҝөндәрилиб.
Фактла бағлы арашдырма апарылыр.
Гејд едәк ки, Ибраһимовлар аиләси Лачын рајонундан Зәрдаба пәнаһ ҝәтириб.
Диггәт: Хәбәрдән истифадә етдикдә мәнбәјә истинад лазымдыр
