Әһли Бејт -АБНА- хәбәр аҝентлијинин вердији хәбәрә әсасән: Әдлијјә Назирлији Иранын Имам Хомејни Имдад Комитәсинин Азәрбајҹан нүмајәндәлијинин гејдијјатыны ләғв едиб. Буна сәбәб кими гурумун һүгуги үнваны дәјишдириләркән бу барәдә назирлијә мәлумат вермәмәси ҝөстәрилиб.
Хатырладаг ки, Имам Хомејни Имдад Комитәси Азәрбајҹанда илләрдир ки, фәалијјәт ҝөстәрир вә һуманитар фәалијјәтлә мәшғул олур.
Фактла бағлы Әдлијјә Назирлији вә Иранын Бакыдакы сәфирлијинин мөвгејини өјрәнә билмәдик.
Гәрары шәрһ едән политолог Зәрдүшт Әлизадә бир мүддәт әввәл һакимијјәтин Норвеч Инсан Һүгуглары Евинин гејдијјатыны ләғв етмәсини хатырладтды. «Һакимијјәт һесаб едир ки, бу ҹәмијјәтләрин фәалијјәти онун мәгсәдләринә ујғун дејил. Бу сәбәбдән дә онлары бағлајыр».
Политологун сөзләринә ҝөрә, Һејдәр Әлијев һакимијјәтә ҝәләндән сонра ҹәбһәдә ҝедән мүһарибә, јүз минләрлә гачгын ордусунун јарандығы заманы һеч ким Имам Хомејни адына Имдад Комитәсинин фәалијјәтинә мане олмады: “Иран бир нечә ил әрзиндә 60 мин гачгыны сахлады, ҝүндә 3 дәфә јемәјини верди, башга јардымлар етди, чадыр шәһәрчикләри гурду. Һәмин вахт һакимијјәт бу ҹәмијјәтә етираз етмирди. Анҹаг инди һакимијјәт мөһкәмләниб, әлләринә бөјүк нефт пуллары ҝәлиб. Даһа белә бир комитәјә еһтијаҹ дурмадыглары үчүн ону бағлајырлар. Әҝәр Комитә дөвләтин вә ја халгын әлејһинә иш ҝөрүрсә, буну ачыгласынлар. Әҝәр хејријјә ҹәмијјәти касыба әл тутурса, ону бағламагда мәгсәд нәдир? Әҝәр Иранын һеч бир нүфузунун олмадығыны истәјирләрсә, бу мүмкүн олан шеј дејил. Чүнки Иран бизим гоншумуздур, мәдәнијјәт, дин бахымындан јахыныг. Биз ҹоғрафи бахымдан гоншујуг вә унутмајаг ки, халгымызын дөрддә үчү орада јашајыр. Әҝәр бу комитә бир ҹинајәт төрәтсәјди, буну јазардылар вә гејдијјатын ләғв едилмәсинин сәбәбини ҝөстәрәрдиләр. Әҝәр сәбәбсиз бағлајыбларса демәли бурада сијаси мотивләр вар”.
Диггәт: Хәбәрдән истифадә етдикдә мәнбәјә истинад лазымдыр
