Әһли Бејт -АБНА- хәбәр аҝентлијинин вердији хәбәрә әсасән: Малијјә Назирлијинин кечирдији јохламада күлли мигдарда јејинти фактларынын ашкарландығы билдирилир
Азалыг гәзетиминә дахил олан мәлумата ҝөрә, малијјә јохламасы тәшәббүсүнү ректор Асәф Ысҝәндәровун һагсыз јерә ишдән говулдуғуну иддиа едән университетин кечмиш әмәкдашлары галдырыб. Нәтиҹәдә Малијјә Назирлијинин Ҹәлилабадда јерләшән ҹәнуб реҝионал шөбәси университетдә јохлама апарыб. Бу јохлама заманы һеч бир јејинти һаллары ашкарланмајыб. Нәтиҹәләри гәбул етмәјән вә јохламанын субјектив апарылдығыны иддиа едән шикајәтчиләрин исрары Малијјә Назирлијини артыг Бакыдан икинҹи јохлама ҝөндәрмәјә сөвг едиб. Бу дәфә исә нәтиҹәләр там фәргли олуб.
Мүсават Партијасы Ләнкәран тәшкилатынын сәдри, сијаси сәбәбләрдән ЛДУ-да мүәллимликдән хариҹ едилән Јадиҝар Садыговун гәзетимизә вердији мәлумата ҝөрә, Малијјә Назирлијинин јохламанын нәтиҹәләри илә бағлы иддиачылара ҝөндәрдији 14/05-185-2247 сајлы мәктубда малијјә нөгсанларынын ашкар едилдији етираф олунур. Мәктубда ҝөстәрилир ки, “нөгсанларын ҹиддилијини нәзәрә алараг мәсәләјә һүгуги гијмәт верилмәси үчүн јохламанын материаллары Азәрбајҹан Республикасынын Баш Прокурорлуғуна ҝөндәрилмишдир”.
Мәктубда јејинтинин мигдары ҝөстәрилмәсә дә сызан мәлуматлара ҝөрә, сөһбәт 160 мин манат ҹиварында мәбләғдән ҝедир. Бу мәбләғә шиширдилмиш хәрҹләр, ҝөрүлмәјән иш үчүн пул силинмәси, көһнә материаллардан јени ады илә истифадә етмәк вә с. позунтулар дахилдир. Мәсәләни артыг Баш Прокурорлуг јанында Коррупсијаја Гаршы Мүбаризә Ыдарәси иҹраата ҝөтүрүб. Тәсәррүфат вә малијјә ишләринә мәсул бәзи шәхсләр артыг Бакыја чағырылараг диндирилибләр.
Јадиҝар Садыговун сөјләдијинә ҝөрә, бир чох јејинтиләр вар, онлары ашкар етмәк Малијјә Назирлијинин јохламасы үчүн дә гејри-мүмкүндүр: “Мәсәлән, дәфтәрхана хәрҹләринә ајрылан вәсаитин мәнимсәнилмәси. Университетдә ишләнән бүтүн кағызлары мүәллимләр, тәләбәләр вә әмәкдашлар өзләри алырлар. Лазым олан сәнәдләрин, бланкларын сурәтини дә өз пуллары илә чыхарырлар. Һәтта јазылы имтаһанларда ишләнән кағызлары да тәләбәләр пул јығыб алырлар. Ректор исә кағыза, картриҹә ишләнмәли олан вәсаити мәнимсәјир. Ән бөјүк биабырчылыг исә имтаһан сессијасы заманы баш верир. Тәләбә вундеркинд олмалыдыр ки, Ләнкәран университетиндә лајиг олдуғу гијмәти ала билсин. Әслиндә, буну јохламаг чох асандыр. Гајдалара ҝөрә, јазылы имтаһанларын ҹаваблары 6 ај горунмалыдыр. Һәмин јазылары гијмәтләндирмә илә мүгајисә етмәк кифајәтдир ки, ЛДУ-да имтаһанларын формал характер дашыдығы, ректорун зәнҝинләшмәсинә хидмәт етдији үзә чыхсын”.
Гејд едәк ки, алынан мәлуматлар Асәф Ысҝәндәровун коррупсијаја гаршы елан едилмиш мүбаризәдән чәкинмәдијини ҝөстәрир. Университети битирмәк үзрә олан сон курс тәләбәләриндән сызан мәлуматлара ҝөрә, дөвләт имтаһаны онлара уҹуз баша ҝәлмәјәҹәк. Артыг бәзи кафедра мүдирләринин дә буна етираз етдикләри, ректордан өтрү һәбсә дүшмәк истәмәдикләрини дилә ҝәтирдикләри сөјләнилир.
Диггәт: Хәбәрдән истифадә етдикдә мәнбәјә истинад лазымдыр
