Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан тәмсилчиләринин “Авровизија 2011” фәсад мүсабигәсиндә галиб ҝәлмәси мүнасибәтилә Масаллыда кечирилән шадјаналыг заманы тутулуб 5 суткалыг һәбс ҹәзасы алан диндарлар Араз Гулијев вә Рза Ағалы мајын 20-дә сәрбәст бурахылмалыдыр. Р.Ағалы барәсиндә ҹәза гәрары чыхаран Масаллы Рајон Мәһкәмәсинин һакими Немәт Мусајев ачыгламасында билдириб ки, диндарларын һәбс ҹәзасы мајын 15-дән, сахландыглары вахтдан һесабланыб.
Ҝүја тутулан ҝәнҹләрин диндар олмасы барәдә мәлумата малик олмајан һаким Араз Гулијев барәдә гәрарын һаким Видади Нәсировун вердијини дејиб: “Авровизија” фәсад мүсабигәсиндә Азәрбајҹан тәмсилчисинин галиб олмасы өлкә үчүн фәхрдир. Буну ешидән һәр бир кәсин севинҹдән ҝөзү долур. Масаллыда да ушаглар күчәләрә чыхыб өз севинҹини билдирибләр. Бу ики нәфәр ушаглара дејиб ки, әхлагсыз адамлара ҝөрә нә үчүн бајрам едирсиниз? Дејибләр ки, онлар Азәрбајҹан менталитетинә ујғун һәрәкәтләр еләмирләр.
Мәһкәмә просесиндә онлара дедим ки, нијә белә еләмисиниз? Ҹәзада 15 суткаја гәдәр һәбс нәзәрдә тутулур, лакин мәним данлагларымдан сонра Араз Гулијев мәнә суал едир ки, һаким, мәҝәр дүз демәмишәмми, онлар бизим менталитетә ујғун дејил. Она дедим ки, сәнә ајыб олсун... Мән белә адамлара сөз тапа билмирәм”.
Һаким Н.Мусајев һазырда онларын Масаллы Рајон Полис Шөбәсинин тәҹридханасында сахландығыны дејиб вә әлавә едиб ки, “Бундан әввәл дә о, 5 сутка ҹәза алыб. Рза Ағалынын исә 21 јашы вар. Онлар һәбс олунаркән әгидәләринә ҝөрә тәгиб олундугларыны билдирибләр. Бурада нә дин, нә мәзһәб мәсәләси...”
Һәр ики шәхс барәсиндә 5 сутка инзибати һәбс ҹәзасы мајын 16-да верилиб. Диндарлар Инзибати Хәталар Мәҹәлләсинин 310.1 маддәси илә (полис ишчиси вә ја һәрби гуллугчу иҹтимаи гајданын мүһафизә вәзифәләрини иҹра едәркән онларын гануни тәләбләринә гәсдән табе олмама) шәрләнәрәк тәгсирли билинибләр.
Диггәт: Хәбәрдән истифадә етдикдә мәнбәјә истинад лазымдыр
