Әһли Бејт АБНА хәбәр аҝентлијинин вердији хәбәрә әсасән: Илһам Әлијевин имзасы илә Милли Мәҹлисә дөвләт бүдҹәсиндән малијјәләшән тәшкилатларда јаш сензинин тәтбиг едилмәси илә бағлы сәнәд дахил олуб. Бу барәдә мәлумат “Гафгазинфо”ја парламентдән верилиб.
Мәлумата ҝөрә, дөвләт башчысынын имзасы илә Әмәк Мәҹәлләсинә вә “Дөвләт гуллуғу һаггында” гануна әлавә вә дәјишиклик едилмәси илә бағлы лајиһә һазырланараг парламентә ҝөндәрилиб. Дүнән Сосиал сијасәт комитәсинин иҹласында бахылан сәнәддә бир сыра сенсасијалы мәгамлар вар. Сәнәддә дөвләт бүдҹәсиндән малијјәләшән тәшкилатларда чалышан бүтүн шәхсләрә јаш сензинин тәтбиг едилмәси нәзәрдә тутулур. Јаш сензи исә 65-дир. Бу јаша чатанлар автоматик олараг тәгаүдә ҝөндәриләҹәк Лакин сәнәддә ики истисна һалы да нәзәрдә тутулуб. Бунлардан бири 65+5-дир, јәни 65 јаша чатан шәхсләрин әҝәр һәмин ишдә фәалијјәтинин давам етдирилмәси зәрури һесаб олунарса, хидмәт даһа 5 ил узадылыр. Амма бу узадылма һәр ил бир ил олмагла һәјата кечирилир. Ыкинҹи истисна һалы даһа чох диггәт чәкир. Бу һал исә 70 јашдан сонра, јәни биринҹи узадылма мүддәти баша чатандан сонра тәтбиг олунур. Лакин бу мүстәсна һалларда баш верә биләр. Әҝәр сөзүҝедән шәхсин әмәк фәалијјәтинин давам етдирилмәси ваҹибдирсә, бу заман мәсәлә мүзакирә олунаҹаг вә нәзәрә алынаҹаг. Бу сәнәд јахын ҝүнләрдә Милли Мәҹлис тәрәфиндән гәбул олунаҹаг.
Охуҹуларын диггәтинә чатдыраг ки, јаш сензинин тәтбиг едилмәси илә бағлы лајиһә һәлә бир нечә ај әввәл һазырланараг парламентә тәгдим едилмишди. Сәнәд, һәтта Милли Мәҹлисин мүвафиг комитәсиндә мүзакирәјә дә чыхарылмышды. Сонрадан бу мәсәлә ҝүндәмдән чыхарылды. Сәбәб исә тәбии ки, һакимијјәтдә хејли јашлы мәмурларын олмасы иди. Һәмин вахт јајылан мәлуматларда билдирилирди ки, јаш сензинин тәтбиг едилмәси илә бағлы лајиһә Президент Администрасијасынын (ПА) рәһбәри Рамиз Меһдијевә вә баш назир Артур Рәсизадәјә гаршы јөнәлиб. Һәмчинин Рамиз Меһдијевин јахын чеврәсинә дахил олан бир сыра јашлы мәмурлар да бу лајиһәнин гурбанларынын сырасында иди.
Әлдә етдијимиз мәлуматлара ҝөрә, лајиһә бу дәфә Рамиз Меһдијевин редактәси илә парламентә тәгдим едилиб. Сәнәддә “истисна һаллар”ын нәзәрдә тутулмасы әслиндә ПА рәһбәринин өзүнү вә әтрафында олан јашлы мәмурлары сығорталамасы анламына ҝәлмәлидир. Она ҝөрә дә лајиһәнин инди Рамиз Меһдијев вә әтрафы үчүн һәр һансы тәһлүкәси јохдур.
Диггәт: Хәбәрдән истифадә етдикдә мәнбәјә истинад лазымдыр
