Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Азәрбајҹанын Шуша шәһәринин ермәниләр тәрәфиндән ишғал олунмасындан 19 ил өтүр.
1992-ҹи ил мајын 8-нә кечән ҝеҹә ермәни бирләшмәләри Шуша шәһәринин ишғалы илә баша чатан әмәлијјат кечириб. Шәһәрин күтләви шәкилдә артиллерија атәшинә тутулмасы мајын 8-дә сәһәр саат 6-дәк давам едиб. Бундан сонра дүшмәнин минә јахын әсҝәри үч тәрәфдән Шушаја һүҹум едиб. Һүҹум Русијанын әввәлдән ермәниләрә вердији 366-ҹы алајын 40 зиреһли техникасынын дәстәјилә һәјата кечирилиб.
Азәрбајҹанын бу гәдим, зәнҝин тарихә вә мәдәнијјәтә малик шәһәринин Ермәнистан Силаһлы Гүввәләри тәрәфиндән әлә кечирилмәси илә Дағлыг Гарабағын ишғалы баша чатдырылыб.
Бунунла, ишғалчы ермәниләр бөлҝәнин Азәрбајҹандан фактики гопарылмасына наил олублар. Шушанын ишғалы нәтиҹәсиндә 480 ҝүнаһсыз вәтәндаш гәтлә јетирилиб, 600 нәфәр јараланыб, 22 мин нәфәр өз јурдундан дидәрҝин дүшүб. Әсир ҝөтүрүлмүш 68 сојдашымызын талеји барәдә бу ҝүнә гәдәр мәлумат јохдур. Ишғал нәтиҹәсиндә Шушадакы бир сыра тарихи-мәдәнијјәт абидәләри дүшмән тәрәфиндән талан едилиб. Бу сијаһыја Хан мағарасы, Гахал мағарасы, Шуша галасы да дахил олмагла бүтөвлүкдә 279 дини, тарихи вә мәдәни абидә дахилдир.
Ермәниләр Азәрбајҹана мәхсус олан бир чох абидәнин мәһв едилмәсинә вә ја ермәниләшдирилмәсинә наил олублар. Онлар Шушада 7 мәктәбәгәдәр ушаг мүәссисәсини, 22 үмумтәһсил мәктәбини, мәдәни-маариф, кәнд тәсәррүфаты техникумларыны, 8 мәдәнијјәт евини, 14 клубу, 20 китабхананы, 2 кинотеатры, 3 музеји, Шәрг мусиги аләтләри фабрикини дағыдыблар.
Үмумиликдә, 1992-ҹи ил мајын 8-дә Ермәнистан Силаһлы Гүввәләринин Шушаны ишғал етмәси нәтиҹәсиндә Азәрбајҹанын 289 квадрат километр әразиси ермәниләрин нәзарәтинә кечиб.
Ики Ҹәнуби Гафгаз өлкәси арасында мүнагишә 1988-ҹи илдә Ермәнистанын Азәрбајҹана гаршы әрази иддиасы ирәли сүрмәси зәмининдә јараныб. Азәрбајҹан торпагларынын ијирми фаизи, јәни Дағлыг Гарабағ әразиси вә бу әразијә битишик једди рајон Ермәнистан силаһлы гүввәләринин ишғалы алтындадыр. 1994-ҹү илдә тәрәфләр атәшкәс режиминә даир разылашма әлдә едибләр вә о вахтдан бәри АТӘТ-ин Минск групунун һимајәси алтында, Русија, Франса вә АБШ-ын һәмсәдрлији илә һәлә дә нәтиҹәсиз сүлһ данышыглары апарылыр.
БМТ Тәһлүкәсизлик Шурасынын Дағлыг Гарабағын вә ишғал олунмуш әразиләрин азад едилмәсинә даир гәбул етдији дөрд гәтнамәни Ермәнистан бу ҝүнә гәдәр јеринә јетирмәјиб.
Диггәт: Хәбәрдән истифадә етдикдә мәнбәјә истинад лазымдыр
