Әһли Бејт -АБНА- хәбәр аҝентлијинин вердији хәбәрә әсасән: Азәрбајҹанда сосиал-сијаси етиразларын илк далғасындан еһтијатланан вә әрәб ингилабларынын нәтиҹәсиндән горхан Азәрбајҹан һөкумәти “ислаһатлара башладыг” шәклиндә истәјинин олдуғуну ҝөстәрмәјә ҹәһд етмишди. Охуҹуларымыз Новруз өнҹәси јумуртанын гијмәтинин ашағы салынмасы үчүн шәхсән президентин ҝөстәриш вердијини јахшы хатырлајырлар. Халг арасында бу ислаһата “јумурта ислаһаты” ады верилмишди. Мүхалифәт сијаси тәзјигләри артырдыгҹа һөкумәт дә өзүнүн “ислаһат” аддымларынын ҝенишләндији барәдә тәблиғат кампанијасыны ҝенишләндирмәкдә иди. Хырда рүшвәт вә хидмәт саһәләриндә даһа чох “чајпулу” олараг адланан ҝөрсәнишләри “коррупсија” кими тәгдим едән һөкумәт, һәтта бир нечә әһәмијјәтсиз вәзифә дашыјан адамлара гаршы ҹинајәт ишләри дә галдырмаға башламышды. Амма сон ҝүнләр ашкар шәкилдә һисс олунур ки, һәтта бу јаланчы тәблиғат да мәһдудлашдырылыр. Тамамилә мүмкүндүр ки, бу јахынларда ән ири күрсүләрдән, ола билсин, һәтта президент сәвијјәсиндә бәјанат сәсләндирилсин ки, “Азәрбајҹанда даһа коррупсија јохдур”.
Әһалијә “коррупсијаја гаршы мүбаризә” кими тәгдим едилән бу сахта кампанијанын деталлары һаггында илҝинҹ мәлуматлар дахил олуб. Һакимијјәт дахилиндәки мәнбә әмәкдашымызла сөһбәтиндә етираф едиб ки, әрәб ингилаблары далғасы вә Азәрбајҹанда мүхалифәтин сијаси ислаһатлар тәләбилә фәал һәрәката башламасы һакимијјәт дахилиндә һәм ҹидди нараһатлыг јарадыб, һәм дә ҹидди чатларын олдуғуну ортаја чыхарыб: “Коррупсијаја гаршы мүбаризә елә бир шүар иди ки, адамлара ”јумурта ислаһаты"ндан фәргли вә даһа ајдын һисс олунан ислаһатлар тәгдим етмәк лазым ҝәлирди. Артыг һөкумәтин коррупсијаја гаршы мүбаризә тәблиғаты иҹтимаи рәјдә иронија вә нифрәтлә гаршыланыр вә һакимијјәт дахилиндә дә һәр кәс буну билир. Һамы ону да билир ки, адамлар коррупсијанын һарада олдуғуну сахта тәблиғатчылардан даһа јахшы билир. Амма коррупсија илә һәгиги мүбаризә апарылсајды, һакимијјәтин әсас дајаглары олан олигархларын мәнафеләри тоггушарды. Һәтта һаким аиләнин өзүнүн гүдрәти дә бирбаша коррупсијаја бағлыдыр. Буна ҝөрә дә, коррупсија илә һәгиги мүбаризә планы, әслиндә, әввәлдән олмајыб. Икинҹиси, белә бир мүбаризә планынын мөвҹудлуғу барәдә, һәтта јаланчы тәблиғат кампанијасынын апарылмасы да чох бөјүк иҹтимаи наразылыг мәнбәләри јарадыр. Мәһз бу сәбәбдән, бу тәблиғат кампанијасыны сүрәтлә сона чатдырмаг, ону мәсәлән, мүһарибә вә саир вәтәнпәрвәрлик мөвзулары илә әвәз етмәк тапшырылыб".
Бу, коррупсија шоусунун бир мәгамыдыр. Бу шоу илә бағлы башга тәфәррүатлар да вар. Белә ки, һакимијјәт дахилиндәки груплашмалар “коррупсија илә мүбаризә” кампанијасындан бир-бирини битирмәк үчүн истифадә етмәјә ҹәһд ҝөстәрибләр. “Азадлыг”а дахил олан башга бир мәлуматда билдирилир ки, Президент Администрасијасынын рәһбәри Рамиз Меһдијев бу кампанијанын ҝедишиндә ады коррупсијада даһа чох һалланан рәгибләрини зәифләтмәк вә онлары өзүндән асылы вәзијјәтә салмаг үчүн антикоррупсија тәблиғатынын һәлә узун мүддәт апарылмасында мараглы олуб. Амма олигархлар Ылһам Әлијеви инандыра билибләр ки, бу кампанијанын ҝенишләндирилмәси вә узун мүддәт давам етмәси сон нәтиҹәдә һакимијјәтә гаршы күтләви чыхышлары интенсивләшдирә вә һакимијјәтин әсасларыны сарсыда биләр.
Беләликлә, “јумурта ислаһаты” илә башланан сахта антикоррупсија тәдбирләринә рәсмән сон гојулду. Бу кампанија јалныз ән ашағы мәмур корпусунун вә хидмәт персоналынын бүдҹәсинә зијан вурду. Мәсәлән, тибб баҹыларынын. Орта вә ири коррупсија әмәлијјатлары исә бу кампанијанын һеч, һәдәфинә дә јахын ҝәлмәди.
Диггәт: Хәбәрдән истифадә етдикдә мәнбәјә истинад лазымдыр
