Әһли Бејт -АБНА- хәбәр аҝентлијинин вердији хәбәрә әсасән: Мајын 1-дә Пакистанын Абботабад шәһәриндә кечирилмиш хүсуси әмәлијјат нәтиҹәсиндә "Әл Гаидә" бејнәлхалг террор шәбәкәсинин лидери Үсамә бин Ладен өлдүрүлүб. Өз нөвбәсиндә исә АБШ Дөвләт Департаменти хариҹдә јашајан вәтәндашларыны террор тәһлүкәси илә бағлы хәбәрдар едиб. Дөвләт Департаменти “Әл Гаидә” лидери Үсамә Бин Ладенин өлдүрүлүмәси илә бағлы вәтәндашларыны бир нечә ҝүн еһтијатлы олмаға чағырыб.
“Әл-Гаидә” террор тәшкилатынын лидери Үсамә Бин Ладенин өлдүрүлмәси илә әлагәдар Азәрбајҹанда тәһлүкәсизлијә гаршы јөнәлән мүмкүн тәһдидләрин гаршысынын алынмасы үзрә өнләјиҹи тәдбирләр ҝөрүлүр. Буну СИА-ја ачыгламасында Азәрбајҹан Милли Тәһлүкәсизлик Назирлијинин (МТН) Иҹтимаијјәтлә Әлагәләр Мәркәзинин рәһбәри Ариф Бабајев дејиб. Үсамә бин Ладенин өлдүрүлмәси илә әлагәдар дүнјада террор тәһлүкәсинин артмасы һаггында АБШ -ын хәбәрдарлығына мүнасибәт билдирән А. Бабајев вурғулајыб кы Азәрбајҹанын милли тәһлүкәсизлијинә, онун мараг вә мәнафеләринә мүмкүн тәһдидләрин гаршысынын алынмасы үчүн Милли Тәһлүкәсизлик Назирлији өз сәлаһијјәтләри чәрчивәсиндә зәрури габаглајыҹы тәдбирләр һәјата кечирир вә әмәлијјат шәраити нәзарәт алтындадыр.
Америка Бирләшмиш Штатларынын вә гәрб өлкәләринин Азәрбајҹандакы сәфирликләринин вә дипломатик нүмајәндәликләрин тәһлүкәсизлији етибарлы шәкилдә горунур. Бу сөзләри исә СИА-ја ачыгламасында Азәрбајҹан Дахили Ишләр Назирлијинин мәтбуат хидмәтинин әмәкдашы Орхан Мансурзадә билдириб. Онун сөзләринә ҝөрә, сәфирликләр, акредитә олунмуш дипломатик корпуслары да дахил олмагла, онларын јерләшдији әрази даим диггәт мәркәзиндәдир. Мүһафизә тәдбирләри јүксәк сәвијјәдә тәшкил олунуб: “ Дахили Ишләр Назирлији бу истигамәтдә үзәринә дүшән вәзифәнин өһдәсиндән ҝәлир”.
Хатырладаг ки, Интерполун баш катиби Роналд Нобл тәшкилата үзв өлкәләри Үсамә бин Ладенин мәһв едилмәсиндән сонра террор актларына мүмкүн ҹәһдләрлә бағлы јүксәк сајыглыг ҝөстәрмәјә чағырыб.
Диггәт: Хәбәрдән истифадә етдикдә мәнбәјә истинад лазымдыр
