Әһли Бејт -АБНА- хәбәр аҝентлијинин вердији хәбәрә әсасән: Мајын 2-дә тәкбәтәк ҝөрүш баша чатдыгдан сонра Азәрбајҹан Президенти Илһам Әлијев вә Литва Президенти Далја Грибаускајте мәтбуата бәјанатларла чыхыш едибләр. Мәлуматы Президентин рәсми сајты јајыб.
Дөвләт башчысы ҝөрүшдә реҝионал тәһлүкәсизлик мәсәләләрини дә мүзакирә етдикләрини билдириб.
Президенти Илһам Әлијев чыхыш едәрәк деди: "Бу мәсәлә, һәмчинин икитәрәфли ҝүндәлијимизин бир һиссәсидир. Ејни заманда, Литва һазырда АТӘТ-ә сәдрлик едән өлкәдир. Мүнагишәнин һәлли мүзакирәләримизин бир һиссәси олду. Узун илләрдир ки, Азәрбајҹан илә Ермәнистан арасындакы мүнагишә һәлл олунмајыб. Минск групу демәк олар ки, 20 илдир фәалијјәт ҝөстәрир. Лакин индијә гәдәр практики нәтиҹәләр јохдур. Бу јахынларда АТӘТ-ин саһә гијмәтләндирмә миссијасы Азәрбајҹанын ишғал олунмуш әразиләринә сәфәр етмиш вә һесабат һазырламышдыр. Һәмин һесабатда ајдын шәкилдә дејилир ки, ишғал олунмуш әразиләрдә бүтүн инфраструктур дағыдылыб, гејри-гануни мәскунлашдырма фактлары вардыр. Рајонларын тарихи адларыны, инзибати сәрһәдләрини дәјишмәк ҹәһдләри вә Ермәнистанын ишғалчы сијасәти илә бағлы бир чох диҝәр сүбутлар вардыр. Азәрбајҹанын Дағлыг Гарабағ бөлҝәсинин инзибати һүдудларындан кәнарда јерләшән 7 рајону да ишғал алтындадыр. Биз етник тәмизләмә сијасәтиндән әзијјәт чәкирик. Бир милјон азәрбајҹанлы өз доғма торпагларында гачгын вә мәҹбури көчкүн вәзијјәтинә дүшмүшдүр. Азәрбајҹанын бејнәлхалг сәвијјәдә танынмыш әразисинин тәхминән 20 фаизи ишғал алтындадыр. Дағлыг Гарабағ Азәрбајҹанын тәркиб һиссәсидир. Әлбәттә ки, мүнагишә бејнәлхалг һүгугун норма вә принсипләри әсасында һәлл едилмәлидир.
Мән ханым Президенти данышыгларын һазыркы статусу, мүзакирә олунан мәсәләләр барәдә мәлуматландырдым. Үмидварыг ки, Ермәнистан АТӘТ-ин Минск групунун тәклифләринә конструктив јанашма нүмајиш етдирмәклә ирәлијә доғру аддым атаҹаг вә Азәрбајҹанын ишғал олунмуш әразиләриндән чыхмаға башлајаҹагдыр. Бундан сонра бөлҝәдә сүлһ бәргәрар ола биләр. Ермәнистан илә Азәрбајҹан арасындакы мүнагишә реҝионал тәһлүкәсизлијә вә сабитлијә әсас тәһдиддир. Бу мүнагишәнин бејнәлхалг һүгуг әсасында тезликлә һәлли бүтүн тәрәфләрин марағындадыр.
Мән, ханым Президентә дәвәти гәбул едиб бу ҝүн өлкәмизә сәфәр етдијинә ҝөрә бир даһа миннәтдарлығымы билдирирәм. Үмидварам ки, сәфәриниз уғурлу олаҹаг вә сәфәриниздән мәмнун галаҹагсыныз.
Диггәт: Хәбәрдән истифадә етдикдә мәнбәјә истинад лазымдыр
