Әһли Бејт -АБНА- хәбәр аҝентлијинин вердији хәбәрә әсасән: Ајлардыр бүтүн дүнјанын ҝүндәмини мәшғул едән әрәб ингилаблары далғасы даһа бир диктатору һакимијјәтдән ашырыб. Јәмәндә үч ајдыр давам едән издиһамлы халг һәрәкаты нәтиҹәсиндә президент Әли Абдулла Салеһ реҝион өлкәләринин һазырладыглары “јол хәритәсини” гәбул едәрәк һакимијјәтдән көнүллү әл чәкмәјә разылашыб. Јәмәнин һаким партијасы Үмуммилли Халг Конгреси дүнән бәјан едиб ки, көрфәз өлкәләри Әмәкдашлыг Шурасы тәрәфиндән тәклиф едилән планы бүтүнлүклә гәбул едир. Һаким партија рәсмиси Тарик Шами дејиб ки, бу барәдә онлар Шураја дахил олан өлкәләрин хариҹи ишләр назирләрини рәсми гајдада мәлуматландырыблар. “Јол хәритәси”нә әсасән, 32 илдир һакимијјәтдә олан Салеһ 30 ҝүн әрзиндә өлкәдә милли бирлик һөкумәтинин формалашмасындан сонра истефаја ҝедәҹәк. Милли бирлик һөкумәтинә мүхалифәт лидерләри рәһбәрлик едәҹәк. Салеһ исә президент сәлаһијјәтләрини витсе-президентә верәҹәк, витсе-президент исә милли бирлик һөкумәти илә бирҝә өлкәдә јени президент сечкиләринә һазырлығы һәјата кечирәҹәк. Сечкиләрә һазырлыг үчүн ики ај мүддәт нәзәрдә тутулуб. Салеһ исә аилә үзвләри вә јахын тәрәфдашлары илә бирликдә тохунулмазлыг статусу әлдә едәҹәк.
Плана әсасән мүхалифәт дә етираз нүмајишләрини дәрһал дајандырмалы, өз тәрәфдарларыны Јәмән шәһәрләринин күчәләриндән чәкмәлидир. Ҝөзләнилир ки, јени һөкумәтин тәркибинин јарысыны Салеһин партијасы формалашдыраҹаг. Назир күрсүләринин 40 фаизини мүхалифәт тәмсилчиләри тутаҹаг, 10 фаиз јерләр исә мүстәгил сијасәтчиләрә вериләҹәк. Хатырладаг ки, көрфәз өлкәләринин бундан әввәлки планы Салеһ тәрәфиндән гәбул едилсә дә мүхалифәт ону рәдд етмишди. Лакин инди мүхалифәт лидерләри јени планла разыдыр. Јәмән президентинин һакимијјәтдән әл чәкмәјә разылашмасы барәдә хәбәрләрдән сонра пајтахт Сәнада онун јүз минә јахын тәрәфдары күчәләрә чыхыб, өлкәнин Аден вә Таиз шәһәрләриндә исә мүхалифәт тәрәфдарлары онун дәрһал һакимијјәтдән ҝетмәси тәләби илә издиһамлы нүмајишләр кечирибләр. АБШ Дөвләт Департаментинин рәсмиси Марк Тонер исә бәјан едиб ки, Јәмәндә һаким партијанын өлкәдахили барышыға јөнәлмиш планы гәбул етмәсини алгышлајыр. Тонерин сөзләринә ҝөрә, АБШ администрасијасы Јәмәндә ләнҝимәдән јени кечид һакимијјәтинин формалашмасына чағырыр. Дөвләт Департаментинин рәсмиси дејиб ки, Вашингтона президент Салеһин истефаја разылашмасы барәдә хәбәр чатыб, онун сөзләринә ҝөрә, АБШ көрфәз өлкәләринин тәшәббүсүнү дәстәкләјир. “Јени кечид һөкумәтинин формалашдырылмасы үчүн диалог башламалыдыр, кечид просеси дәрһал башламалыдыр”, дејә дипломат билдириб.
Гејд едәк ки, АБШ Јәмәндә һакимијјәт дәјишиклијинә еһтијатла јанашыр. Чүнки президент Салеһ узун мүддәт “Әл-Гаидә”јә гаршы мүбаризәдә АБШ-ын јахын мүттәфиги олуб. Лакин Вашингтон баша дүшүр ки, Јәмәндә 3 ајдан чохдур давам едән нүмајишләрин вәтәндаш мүһарибәсинә кечмәси рискинин бөјүк олдуғу бир вахтда Салеһин һакимијјәтдә галмасы даһа тәһлүкәли нәтиҹәләрә сәбәб ола биләр. Белә ки, Јәмән ордусунун бир һиссәси мүхалифәтин тәрәфиндәдир, сон һәфтәләрдә артыг өлкәдә мүхалифәт вә һакимијјәт тәрәфдарлары арасында силаһлы гаршыдурмалар баш вермәкдә иди. Индијәдәк Јәмәндә етираз нүмајишләринә гаршы ҝүҹ тәтбиг едилмәси нәтиҹәсиндә јүзләрлә адам һәлак олуб.
Јәмәндә президент Әли Абдулла Салеһин истефаја ҝетмәјә разылашдығы бир вахтда Ливијада исә јарым әсрдир һакимијјәтдә олан вә нечә ајлардыр ки, халгы илә ганлы мүһарибәләрдә индијәдәк 10 миндән чох вәтәндашыны гәтлә јетирән полковник Гәззафинин гошунларынын мүһасирәдә олан Мисрата шәһәриндән чәкилдији һагда хәбәрләр јајылыб. Ливија һөкумәти хәбәрдарлыг едиб ки, Мисратаја һүҹуму өз үзәринә полковник Гәззафијә садиг тајфалар ҝөтүрә биләр, бу исә һадисәләрин даһа ганлы олмасына ҝәтириб чыхарар. Ливија хариҹи ишләр назиринин мүавини Халед Гаим дејиб ки, һөкумәт гошунлары Мисратанын әтрафыны тәрк едирләр, лакин јерли тајфалар үсјанчылара гаршы белә лүтфкар олмајаҹаглар. Лакин үсјанчыларын әсас шәһәри олан Бенгазидә һәрби сөзчү дејиб ки, Гәззафи ојун ојнајыр вә о, өз гошунларынын Мисратадан чәкилмәсинә һеч вахт јол вермәз. Үсјанчыларын нәзарәтиндә олан Мисрата шәһәри артыг ики ајдыр ки, мүһасирәдәдир. Бунунла белә, һазырда Мисратада баш верәнләр һеч дә ајдын дејил. Үсјанчылар һөкумәт снајперләринин дөјүшдүјү бир мәһәлләдә үстүнлүјү әлә алыблар. Бир јаралы һөкумәт әсҝәри “Рөјтер”ә билдириб ки, онлара Мисратаны тәрк етмәк әмри Ҹүмә ҝүнү верилиб. Лакин дүнән Гәззафи артиллеријасынын шәһәрә јени зәрбәләр ендирдији, онларла адамын һәлак олдуғу хәбәр верилиб. Пајтахт Триполидә исә хариҹи журналистләри Гәззафинин әсас бункери олан Баб Әзизијјә базасына апарыблар. Орада бункерләрдән биринин ики ракет зәрбәсиндән дешилдији нүмајиш етдирилиб. Хәбәр верилир ки, зәрбәләр Ҹүмә ҝүнү ҝеҹә НАТО гырыҹылары тәрәфиндән ендирилиб.
Диггәт: Хәбәрдән истифадә етдикдә мәнбәјә истинад лазымдыр
