Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Мүсават Партијасы Диванынын нөвбәти топлантысы кечирилиб. Өнҹә гәрарларын иҹрасы вә ҝөрүлән ишләрә бахылыб.
Ҝүндәлијин иҹтимаи-сијаси вәзијјәтә даир бөлүмүндә Иҹтимаи Палатанын митингиндә иштиракына ҝөрә мүхалифәт нүмајәндәләринә гаршы репрессијалар мүзакирә едилиб. Диван инзибати һәбс гајдасында 7 сутка ҹәза алмыш Рүфәт Һаҹыбәјлијә гаршы ҹинајәт ишинин ачылмасыны кәскин гынајараг, һакимијјәтин митинг иштиракчыларына гаршы сахта, һеч бир һүгуги әсасы олмајан ҹинајәт ишини ләғв етмәк әвәзинә репрессијалары даһа да артырмаг хәттини писләјиб. 25 апрел 2011-ҹи ил тарихдә мүсаватчы Дүнјаханым Ҹәрулланын Сәбаил рајон Полис Идарәсинә апарылмасы факты да мүзакирә едилиб. Гејд едилиб ки, әввәлки һәбсләр, галдырылмыш ҹинајәт ишләри вә аксијадан сонра мүхалифәт фәалларынын ифадә вермәк үчүн полис идарәләринә апарылмалары ҹәмијјәтдә хоф јаратмаг мәгсәдилә едилир.
Диван бу ҹүр репрессив тәдбирләрлә ҹәмијјәтин артан наразылығынын вә мүбаризә әзминин гаршысынын алынмасынын гејри-мүмкүн олдуғуну вурғулајыб. Күтләви аксијаларын давам етдирилмәси мәсәләси ҹидди мүзакирә едилиб вә бир сыра тәклифләр сәсләндирилиб. Гәрара алыныб ки, бу тәклифләр Иҹтимаи Палатада мүзакирәјә тәгдим едилсин. Иҹтимаи Палатанын сәрбәст топлашмаг азадлығыныны тәмин едилмәси проблеминин мүзакирәси үчүн Бакы шәһәр Иҹра Һакимијјәтинә ҝөндәрдији мәктуба мәнфи ҹаваб верилмәси даһа сонракы мәктуба исә һәлә дә ҹаваб верилмәмәси ҝөстәрир ки, вәзијјәтин ҝәрҝинләшдирилмәсини һакимијјәт өзү истәјир. Әҝәр бундан сонра да бу ҹүр мөвге тутулаҹагса, инсанларын сәрбәст топлашмасынын гаршысынын алынмасы заманы баш верә биләҹәк гаршыдурманын мәсулијјәти онун үзәриндә галаҹаг.
Әрәб дүнјасында ҝедән ингилаби просесләр дә мүзакирә олунуб. Јәмән президенти Абдулла Салеһин һакимијјәтдән ҝетмәк үзрә олдуғу вурғуланыб. Өз халгына гаршы ҝүллә атан Ливија диктатору Мүәммәр Гәддафинин јолуну тутдуғу тәәссүфлә гејд едилиб. Ејни заманда билдирилиб ки, истәнилән һалда диктаторлар мәғлуб олаҹаглар вә төрәтдикләринә ҝөрә ҹаваб верәҹәкләр.
“Мүсават-100” тәдбирләр чәрчивәсиндә 1920-ҹи илин 28 апрел ишғалы илә бағлы әввәлҹәдән планлашдырылмыш тәдбир һаггында фикир мүбадиләси апарылыб. Гәрара алыныб ки, һәмин тәдбир 28 апрел 2011-ҹи ил тарихдә саат 15:00-да Мүсават Партијасынын Мәркәзи гәрарҝаһында кечирилсин. Һәмин тәдбирә мүтәхәссисләрин вә медиа нүмајәндәләринин дәвәтли олдуғу билдирилиб.
Сонда ҹари мәсәләләрә бахылыб.
Диггәт: Хәбәрдән истифадә етдикдә мәнбәјә истинад лазымдыр
