Әһли БеЈт -АБНА- хәбәр аҝентлиЈинин вердиЈи хәбәрә әсасән: Бу ҝүн саат 14.30 радәләриндә 4 нәфәр мүлки ҝеЈимли шәхс АДП Ҝәнҹләр Тәшкилатынын сәдр мүавини Камал ҺүсеЈнов вә партиЈанын Низами РаЈон Тәшкилатынын ҝәнҹләрлә иш үзрә сәдр мүавини Орхан ҺүсеЈновун Јашадығы евә ҝәләрәк онлары полисә ҝетмәк ады илә намәлум истигамәтә апарыблар.
Ады чәкилән ҝәнҹләр гардашдырлар вә еЈни мәнзилдә ЈашаЈырлар. ҺүсеЈновларын мәнзилинә ҝәләнләр өзләрини тәгдим етмәЈиб, онлара гапы ачан Орхан ҺүсеЈновун һәЈат Јолдашы Ҝүлнарә ҺүсеЈнә гаршы чох кобуд рәфтар едибләр вә ону итәләЈәрәк мәнзилә сохулублар. Бундан сонра исә Камалы вә Орханы зорла, сүрүЈәрәк евдән чыхарыблар. Баш верәнләрдән психоложи сарсынты кечирән Ҝүлнарә ханым ҝәнҹләрин һансы автомобилә әЈләшдириләрәк апарылдығыны мүшаһидә едә билмәЈиб.
Һазырда Камал вә Орхан ҺүсеЈновларын һарада сахланмасы илә әлагәдар һәм партиЈа Јолдашлары, һәм дә Јахынлары мәлумат әлдә етмәк үчүн тәдбирләр ҝөрүрләр. Онларын мобил телефонлары сөндүрүлүб вә һарада олмаглары илә әлагәдар һеч бир мәлумат әлдә етмәк мүмкүн деЈил. АДП Мәркәзи Апаратынын әмәкдашларынын полис идарәләринә етдикләри мүраҹиәтләр дә һәләлик һеч бир мүсбәт нәтиҹә вермәЈиб вә ҝәнҹләрин полис тәрәфиндән сахланмасы тәкзиб олунур.
Полисин тәкзиб етмәсинә бахмаЈараг, партиЈанын тәшкилат вә ҝәнҹләр шөбәсиндә ҝүман едирләр ки, Камал вә Орхан ҺүсеЈновлар полис тәрәфиндән, Иҹтимаи Палатанын апрелин 2-нә тәЈин етдиЈи митинглә әлагәдар полис тәрәфиндән һәбс едилибләр.
Хатырладаг ки, Камал ҺүсеЈновун 14 саЈлы Хәзәр 2-ҹи сечки даирәсиндән намизәд олараг Иҹтимаи ПалатаЈа бу Јахынларда гошулуб. ЕЈни заманда һәр ики АДП-чи ҝәнҹ мүстәгил ҝәнҹләрин мартын 11-дә тәшкил етдикләри аксиЈада фәал иштирак етдикләринә ҝөрә, онларын һаггында мүвафиг олараг Сәбаил вә Нәсими раЈон мәһкәмәләри тәрәфиндән геЈри гануни олараг Једди суткалыг инзибати һәбс ҹәзасы гәрары чыхарылмышды. ҮмумиЈЈәтлә һәм сосиал шәбәкәләрдә, һәм дә ҹанлы олараг адлары чәкилән ҝәнҹләр кифаЈәт гәдәр фәал тәблиғатла мәшғул идиләр. Бүтүн бунлары нәзәрә алараг Камал вә Орхан ҺүсеЈновларын мәһз полис тәрәфиндән оғурланараг һәбс едилмәси шүбһә доғурмур.
Мәлумат үчүн билдирәк ки, Дахили ишләр НазирлиЈинә вә һүгуг мүдафиә тәшкилатларына ҝәҹләрин талеЈи илә әлагәдар мүвафиг мүраҹиәтләр олунуб.
Диггәт: Хәбәрдән истифадә етдикдә мәнбәЈә истинад лазымдыр.
