Әһли Бејт -АБНА- хәбәр аҝентлијинин вердији хәбәрә әсасән:Мәһәммәдрза Мәһдәви Кәни 1931-ҹи илдә Теһран јахынлығында јерләшән Кән кәндиндә анадан олуб. О, Иран Ислам Ингилабындан сонра "Ингилаб Шурасы"ны тәшкил едән 5 әсас руһанидән биридир. Кәни Рәҹаји һөкумәти дөврүндә дахили ишләр назири, о өлдүрүлдүкдән сонра мүвәггәти баш назир вәзифәләриндә чалышыб. Ајәтуллаһ Мәһдәви Кәни һәмчинин Хобреган Експертләр Мәҹлисинин үзвү вә Үсулҝәра (Мүһафизәкарлар) дүшәрҝәсинин ән әһәмијјәтли партијаларындан олан Мүбариз Руһаниләр Ҹәмијјәтинин баш катибидир.
Хобреган Експертләр Мәҹлисинин 86 үзвү вар. Бу мәҹлис адәтән һәр 6 ајдан бир иҹлас тәшкил едир вә һәр ики илдән бир Рәјасәт Һејәти нәсечкиләр кечирир. Рәјасәт Һејәтинин тәркибиндә сәдр, биринҹи мүавин, икинҹи мүавин вә Рәјасәт Һејәтинин ики катиби сечилир.
2007-ҹи илдә Хобреган Експертләр Мәҹлисинин сабиг сәдри ајәтуллаһ Мешкини вәфат етдикдән сонра бу мәҹлисә сабиг президент вә Мәсләһәт Шурасынын сәдри ајәтуллаһ Әли Әкбәр Һашими Рәфсәнҹани сәдр сечилди.
Сон ҝүнләрдә Експертләр Мәҹлисинин иҹласынын јахынлашмасы илә әлагәдар һөкумәтә јахын КИВ-ләр ајәтуллаһ Рәфсәнҹанинин диҝәр шәхслә әвәз олунмасы зәрурәти барәдә мәлуматлар дәрҹ едибләр. Ајәтуллаһ Һашими Рәфсәнҹани дә буҝүнкү иҹласын әввәлиндә чыхышы заманы билдириб ки, әҝәр Мәһдәви Кәни сәдрлик үчүн намизәдлијини ирәли сүрәрсә, ону дәстәкләјәҹәк вә онун хејринә ҝери чәкиләҹәк.
Иран Конститусијасынын 107-ҹи маддәсинә әсасән, Хобреган Експертләр Мәҹлисинин әсас вәзифәси ајәтуллаһ Руһуллаһ Хомејнинин вәфатындан сонра Ислам Республикасына Али Рәһбәр сечмәкдир.
Бу маддәнин тәләбинә ҝөрә, Али Рәһбәр вәфат едәрсә, ишиндән узаглашарса вә ја үзәринә ҝөтүрдүјү өһдәлији һәјата кечирә билмәзсә, Хобреган Експертләр Мәҹлисинин үзвләри "Шәртләри өзүндә топлајан фәгиһләр" арасындан онун јеринә шәхс сечмәлидирләр.
Диггәт: Хәбәрдән истифадә етдикдә мәнбәјә истинад лазымдыр
