Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Республикасынын милли тәһлүкәсизлији, мараг вә мәнафеләринә мүмкүн тәһдидләрин гаршынын алынмасы үзрә зәрури, габаглајыҹы тәдбирләр һәјата кечирилир, әмәлијјат шәраитинә нәзарәт олунур.
Буну Милли Тәһлүкәсизлик Назирлијинин Иҹтимаи Әлагәләр Мәркәзинин рәһбәри Ариф Бабајев вердији ачыгламасында өлкәдә еһтимал олунан террор тәһлүкәси барәдә бир нечә өлкәнин сәфирлијинин јајдығы ачыгламаны шәрһ едәркән дејиб.
“Азәрбајҹан сабитлијин етибарлы тәмин олундуғу өлкәләрдән биридир”. Буну исә Азәрбајҹан Дахили Ишләр Назирлијинин мәтбуат хидмәтинин рәиси, полис полковники Садиг Ҝөзәлов дејиб.
С. Ҝөзәлов ејни заманда әлавә едиб ки, һеч бир дөвләт террор тәһлүкәсиндән сығорталанмајыб: “Амма Азәрбајҹанда фәалијјәт ҝөстәрән бүтүн дипломатик нүмајәндәликләр, онларын әмәкдашларынын јашадыглары евләр горунур, тәһлүкәсизликләри тәмин олунур. Өлкәдә әмәлијјат шәраитинә ҹидди нәзарәт едилир. Азәрбајҹанын һүгуг-мүһафизә органлары, о ҹүмләдән Дахили Ишләр Назирлији бу јөндә үзәринә дүшән вәзифәләрин өһдәсиндән ҝәлир”.
Гејд едәк ки, АБШ вә Бөјүк Британијанын Азәрбајҹандакы сәфирликләри вәтәндашларына террор тәһлүкәси илә бағлы јанварын сонунда хәбәрдарлыг едиб. АБШ сәфирлији бу хәбәрдарлығыны өтән ҝүн бир даһа тәкрарлајыб. Исраил Террора гаршы Мүбаризә Гәрарҝаһы исә вәтәндашларынын 9 өлкәјә ҝетмәмәсини төвсијә едиб, бунлардан бири дә Азәрбајҹандыр. Бу ҝүн Исраилин Азәрбајҹандакы сәфирлији дә фәалијјәтини мүвәггәти дајандырыб.
Диггәт: Хәбәрдән истифадә етдикдә мәбәјә истинад лазымдыр
