Әһли Бејт -АБНА- хәбәр аҝентлијинин вердији хәбәрә әсасән: Јевлах шәһәр сакини Магсуд Сүлејмановун рајон иҹра һакимијјәтинин башчысы Елмар Вәлијевин коррупсија әмәлләри барәдә президент Илһам Әлијевә вә Һејдәр Әлијев Фондунун президенти Меһрибан Әлијеваја мүраҹиәт едәрәк саһибкар һүгугларынын РИҺ башчысы Елмар Вәлијев тәрәфиндән неҹә позулдуғуну мүраҹиәтдә ачыг билдирмиш вә өлкә рәһбәриндән көмәк истәмишди.
Хатырладаг ки, иш адамы 4 иллик давамлы хаһишләринә мәһәл гојулмадығындан, өтән илин мајында дөвләтин бүтүн сәлаһијјәтли органларына әризә илә мүраҹиәт едиб. Лакин јалныз ДИН-ин Баш Мүтәшәккил Ҹинајәткарлыгла Мүбаризә Идарәсиндән ҹаваб ҝәлиб вә тәһгигат јолу илә һәгигәтән дә Е.Вәлијевин она 25 мин манат зијан вурдуғу сәнәдләрлә тәсдигләниб, һәтта тәһгигат дөврүндә она гаршы тәрәф үст-үстә 1400 манат пул да өдәјиб. Пулун галаны исә индијәдәк гајтарылмајыб.
Гејд едәк ки, Јевлах сакининин мүраҹиәти бу ајын әввәлиндә “Тәзадлар” гәзетиндә дә дәрҹ олунуб. Мараглыдыр ки, мүраҹиәт мәтбуатда дәрҹ едилдикдән сонра гәзетләрә зәнҝ едән Магсуд Сүлејманов онун адындан верилмиш јазынын дајандырылмасыны хаһиш едиб. Бу ҝүнләрдә исә “Јени Мүсават”а М.Сүлејмановун адындан јазылмыш мәктуб дахил олуб. Мәктубда гејд едилир ки, гәзетимизин 3 феврал 2011-ҹи ил тарихли сајында ҝетмиш “Јевлағын иҹра башчысы Ҝөјҝөлдә 3 вилла тикдириб” башлыглы мәгаләдә онун адындан истифадә олунуб.
Мәсәлә илә бағлы дүнән М.Сүлејмановла әлагә сахладыг. Лакин чохсајлы зәнҝләримизә бахмајараг онунла данышмаг мүмкүн олмады. Јевлахдан алдығымыз мәлумата ҝөрә исә М.Сүлејманов иҹра башчысынын тәзјигләри илә үзләшиб вә һәмин мәктублар да мәһз башга шәхсләр тәрәфиндән јазылыб: “Јахшы олар ки, Магсуд Сүлејманов Баш Прокурорлуғун Коррупсијаја Гаршы Мүбаризә Идарәсинә чағырылыб диндирилсин. О, дејиләнләрлә бағлы һеч бир тәкзиб вермәјиб. Һәјат јолдашы да дејиләнләрин үстүндә дурур. Садәҹә, иҹра башчысы ону полисә апартдырараг дөјдүрүб. Даһа дәгиг десәк, мәгаләнин дәрҹ едилдији ҝүнүн ертәси ону аиләси илә бирҝә зорла полис идарәсинә апарыблар вә бурда она тәзјигләр олуб”.
Дејиләнләрлә әлагәдар “Тәзадлар” гәзетинин баш редактору Асиф Мәрзили илә дә телефон әлагәси сахладыг. Баш редактор М.Сүлејмановун ајын әввәлиндә она зәнҝ едәркән чох һәјәҹанлы олдуғуну деди: “Президентә мүраҹиәти дәрҹ олунандан сонра мәним мобил телефонума зәнҝ етди. Сәси титрәјирди. Һалбуки бир ҝүн габаг мәнимлә белә тонда данышмамышды. Бу дәфә иҹра башчысынын хејринә данышдығы үчүн шүбһәләндим. Јенә һәјәҹанла билдирди ки, ”Асиф мүәллим, Сиздән хаһиш едирәм, адымдан истифадә олунмасына јол вермәјин. Мәним Јевлағын башчысы илә артыг проблемим јохдур..." вә с. Ачыгҹа һисс олунурду ки, она тәзјиг едилиб".
Баш редактор она М.Сүлејмановун һәјат јолдашы адындан зәнҝ олдуғуну да деди: “Јахшы билирәм ки, Магсуд Сүлејмановун һәјат јолдашы дејиләнләри тәкзиб етмәкдән имтина едиб. Мәнимлә данышан исә садәҹә, иҹра һакимијјәтиндә ишләјән бир ханым олуб вә адыны да билирәм”. А.Мәрзили ону да әлавә етди ки, бу ҝүнләрдә өзүнү М.Сүлејмановун јахын досту кими тәгдим едән шәхс она мәлумат вериб ки, шикајәтчи “Тәзадлар”ын баш редакторуна зәнҝ едәркән тәзјиг алтында олуб. Асиф бәј һазырда иш адамынын ев дустағы едилдијини деди.
Диггәт: Хәбәрдән истифадә етдикдә мәбәјә истинад лазымдыр
