Бу ҝүн Дашалты әмәлијјатындан 19 ил өтүр. 1992-ҹи ил јанварын 26-да кечирилән һәрби әмәлијјат заманы Азәрбајҹан Ордусунун иткиләри чох олса да, әсҝәрләримиз сон ана гәдәр вурушублар. Тәкҹә илк көнүллүләрдән ибарәт табор 77 шәһид вериб. Бу ил дә бу тарих Шәһидләр хијабанында анылыб. Дашалты әмәлијјатынын иштиракчылары вә шәһидләрин јахынлары хијабаны зијарәт едибләр.
Кечмиш дөјүшчү Фүзули Рзагулијев Анс-ә мүсаһибәсиндә билдириб ки, Дашалты әмәлијјаты заманы мәгсәдләри дүшмәни мәһв етмәк, ермәни силаһлы бөлмәләринин ишғалынын гаршысыны алмаг олуб.
“Биз һәмин вахт гејри-бәрабәр дөјүшләрә ҝирирдик. Дөјүшдә иткиләримизин бөјүк олмасына бахмајараг, дүшмән дә бөјүк итки илә үзләшди. Биз онларын “КамАЗ”ла долу шәхси һејәтини мәһв етдик, даһа сонра кәндин ичинә дахил олараг орада да дүшмәнин ҹанлы гүввәләрини мәһв етдик. Мән һәмин дөјүшдә һәрбчиләримизин мәтинлијинин шаһиди олдум. Онлар дүшмәнә әсир дүшмәмәк үчүн өзләрини белә өлдүрмәкдән чәкинмирдиләр. Елшән Хәлилов әсир дүшмәмәк үчүн Ф-1 гумбарасы илә өзүнү партлатды, Заур Ҹәфәров сон ҝүлләсини өзүнә сыхды. Биз садәҹә дөјүшү удузмушуг, мүгәддәс мүһарибә һәлә габагдадыр”.
Хатырладаг ки, 1992-ҹи ил јанварын 26-да кечирилмиш "Дашалты әмәлијјат"ы уғурсузлугла нәтиҹәләниб. Шуша јахынлығында јерләшән Дашалты кәндинин азад едилмәси мәгсәди илә һәјата кечирилән әмәлијјата сабиг мүдафиә назири, ҝенерал-мајор Таҹәддин Меһдијев өзү билаваситә рәһбәрлик едиб. Әмәлијјатда јениҹә јаранмыш Азәрбајҹан Ордусунун көнүллүләрдән ибарәт 3 бөлүјү вә Шуша шәһәринин мүдафиә таборунун дөјүшчүләри иштирак едиб. Тактики сәһвләр, груплар арасында рабитә әлагәсинин олмамасы, әмәлијјат сирринин јајылмасы вә бәләдчиләрин хәјанәти нәтиҹәсиндә Нәбиләр кәнди истигамәтиндән Дашалтыја дахил олан Азәрбајҹан тағымлары дүшмәнин пусгусуна дүшәрәк тамамилә мәһв едилиб. Кәндә дахил олмуш бир нечә тағым исә хејли итки верәрәк ҝери чәкилә билиб. Рәсми мәлуматлара ҝөрә, Дашалты әмәлијјатында Азәрбајҹан Ордусу 90 нәфәрдән артыг итки вериб, онларын бөјүк әксәријјәти һәлә дә иткин дүшмүш сајылыр. Дөјүшдә ермәниләр дә бир нечә техника вә 80-ә јахын ҹанлы гүввә итириб.
Аллаһ бүтүн шәһидләримизә рәһмәт етсин! Амин.
