Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Ислам Партијасына јени сәдр тәјин едилди. Партијанын јени сәдри Елчин Манафовдур. О, 1971-ҹи илдә Бакыда анадан олуб. Орта ихтисас тәһсили вар. 1992-2001-ҹи илләр арасында гыса фасиләләрлә Иран Ислам Республикасында дини тәһсил алыб.
Елчин Манафов Медиа форум сајтына вердији мүсаһибәни нәзәринизә ҹәлб едирик.
- Неҹә олду ки, партија сәдри тәјин едилдиниз?
- Јанварын 24-дә Азәрбајҹан Ислам Партијасы Баш Мәҹлисинин иҹласы кечирилди. Партија сәдри мүәјјән сәбәбләр үзүндән өз вәзифәсини иҹра едә билмәјәндә, низамнамәјә әсасән, ону биринҹи мүавини әвәзләјә биләр. Мәним сәдр кими фәалијјәтә башламағым мәсләһәт олду. Баш Мәҹлисин гәрары илә сәдр тәјин едилдим.
- Партија вә онун функсионерләри илә бағлы хејли проблем вар. Белә чәтин дурумда фәалијјәтинизи неҹә планлашдыраҹагсыныз?
- Партија әтрафында баш верәнләр бизи руһдан салмыр. Бүтүн бунлара тәбии бахырыг. Бу бизим һиҹабла мүбаризәдән горунмағымыздыр. Биз өзүмүзү мүдафиә едирик вә чалышырыг ки, һансыса нәтиҹәјә чатаг. Биз бу мүбаризәдә јенә дә варыг.
Амма партијанын әсас иши маарифчиликдир. Әввәлдә дә, инди дә демишик ки, бизим башга мәсәләләрлә бағлылығымыз јохдур. Бизим һеч һакимијјәтә дә иддиамыз јохдур. Дүздүр, сијаси партија олараг парламентдә тәмсил олунмаг истәмишик. Бу, һәр бир сијаси партијанын һүгугудур.
Мән мүвәггәти олараг бу вәзифәнин иҹрачысыјам. Үмидварыг ки, һагг-әдаләт өз јерини тутар, Һаҹы Мөвсүм дә тезликлә азад олунар. Буна үмидварыг.
- Партија үзвләри, функсионерләринин мүдафиәси истигамәтиндә һансы аддымлары атаҹагсыныз?
- Бүтүн сивил јоллардан истифадә едәҹәјик. Истәр онлара вәкил тутулмасына јардым етмәк, истәр бәјанатлар вермәк, истәр бејнәлхалг тәшкилатлара мүраҹиәт етмәк... Бүтүн мүасир вә динҹ васитәләрдән истифадә едәҹәјик.
- Партијанын гәрарҝаһ проблеми дә вар. Бу мәсәләни неҹә һәлл етмәк истәјирсиниз?
- Мүстәнтиг Меһди Мирзәјев партија үзвләринә билдириб ки, офисин бағланмасы мүвәггәти характер дашыјыр. Офисдән апардыглары аваданлыглары, ејни заманда ачары үч ҝүн әрзиндә гајтармалы идиләр. Мүхтәлиф бәһанәләрлә ачары гајтармаг истәмирләр. Мүстәнтиг ҝаһ деди хәстәјәм, ҝаһ башга бәһанә ҝәтирди. Јәни биз өз ишимиздә исрарлыјыг, руһдан дүшмүрүк. Үмидимиз вар ки, Аллаһын көмәји илә һәр шеј јахшы олаҹаг.
- Партијанын рәсми гејдијјаты јохдур. Мәлуматлара ҝөрә, сонунҹу дәфә 2007-ҹи илдә, партијанын сонунҹу гурултајындан сонра Әдлијјә Назирлијинә мүраҹиәт олунуб. Тәкрар мүраҹиәтә еһтијаҹ ҝөрүрсүнүзмү?
- 2007-ҹи илдән индијә гәдәр Әдлијјә Назирлијиндән сәнәдләрлә бағлы һәр һансы проблемин олдуғуну демәјибләр. Ҝәрәк онлар өзләри бизә десинләр ки, һансы чатышмазлыг вар. Биз онларын ҹавабыны ҝөзләјирик.
- Азәрбајҹан Ислам Партијасынын Иран Ислам Республикасындан дәстәк алмасы барәдә дејиләнләрә неҹә мүнасибәт билдирәрдиниз?
- Бош сөзләрдир вә онлары ҹәфәнҝијјат һесаб едирик. Һәр һансы бир дәстәкдән сөһбәт ҝедирсә, бу јалныз мәнәви дәстәк ола биләр, нәјә ҝөрә ону сијасиләшдирирләр? Мәнәви дәстәк тәкҹә Ирандан дејил, Русијадан, Түркијәдән, елә Авропанын өзүндән дә ҝәлир. Нәјә ҝөрә мәһз Иранын адынын даһа чох чәкилмәси бизи тәәҹҹүбләндирир. Нәјә ҝөрә баш верән просесләри Иранла бағлајырлар? Нә гәдәр мәнтигсиздир - ҝуја биз Иранын сифариши илә һиҹаб проблеминдә мүдафиәјә галхмышыг. Мәҝәр киши өз намусуну, гејрәтини сифаришлә мүдафиә едир? Бу, чох ҝүлүнҹ мәсәләдир.
Диггәт: Хәбәрдән истифадә етдикдә мәнбәјә истинад лазымдыр
