Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Ислам Партијасы партија сәдринин ганунсуз һәбси вә барәсиндәки бөһтанларла әлагәдар бәјанат јајымлајыб.
Бәјанат билдирилир:
"Азәрбајҹан Ислам Партијасы сијаси фәалијјәтә башладығы 1992-ҹи илдән Азәрбајҹан дөвләтинин мөһкәмләнмәси уғрунда мүбаризә апармыш, 70 иллик совет режиминин халгымызын милли-мәнәви дәјәрләринә, менталитетинә вурдуғу јараларын тәдриҹән сағалмасына чалышмышдыр.
АИП-ин ҹәмијјәтдә дәстәкләнмәси вә онун тәрәфдарларынын артмасынын әсас сәбәбләриндән бири дә мәһз партијанын ашкар вә шәффаф шәкилдә сијаси фәалијјәт ҝөстәрмәси, өлкәдахили вә хариҹи сијасәтдә јол верилән нөгсанлары тәнгид етмәсидир. Бу аддымларына ҝөрә сијаси гурумун рәһбәрлији вә үзвләри даим тәзјиг вә тәгибләрә мәруз галмышлар.
Елә һәмин репресијјаларын давамы кими јанварын 7-дә ахшам саатларында АИП рәһбәрлији мәркәзи гәрарҝаһын гаршысында сахланылараг, Нәриманов рајон Полис Идарәсинин 18-ҹи Полис бөлмәсинә апарылмышдыр. Јанвар ајынын 8-9-да да партијанын рәһбәрлијиндә тәмсил олунан диҝәр шәхсләрин һәбси давам етмишдир. Гејри-гануни сахланыланларын әксәријјәти инзибати гајдада ҹәзаландырылсалар да АИП сәдри Һаҹы Мөвсүм Сәмәдова гаршы иғтишашлар төрәтмәк, иҹтимаи тәһлүкәсизлији позмаг, инсанларын ҹиһада тәһрики кими ујдурма иттиһамлар ирәли сүрүлмүшдүр. Һәтта бу ҝүнәдәк онун сахланма јери дә бәлли дејил.
АИП бүтүн баш верәнләри илк нөвбәдә әһалисинин 95%-и мүсәлман олан бир өлкәдә Ислами дәјәрләрә вә онун дашыјыҹыларына гаршы тәҹавүз кими гијмәтләндирир. АИП гурумун сәдринә вә үзвләринә гаршы едилән тәгиб вәт тәзјигләри гәтијјәтлә писләјир вә әсассыз иттиһамлары тамамилә рәдд едир. АИП сифаришли репресијјаларын тезликлә дајандырылмасыны вә һәбс олунанларын азадлыға бурахылмасыны тәләб едир."
Диггәт: Хәбәрдән истифадә етдикдә мәнбәјә истинад лазымдыр.
