Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Ислам Партијасынын сәдри Мөвсүм Сәмәдов вә онунла бирҝә 3 нәфәрин һәбс олунмасы барәдә мүхтәлиф вариантлар сәсләнсә дә, АИП-дән алдығымыз мәлуматда һадисәнин тәфәрүаты барәдә дәгиг информасија верилиб.
Мәлумата ҝөрә, АИП сәдри Мөвсүм Сәмәдов вә онунла бирҝә олан Вагиф Абдуллајев, Елчин Һәсәнов вә Мирһүсејн Казымов, партија гәрарҝаһындан "Һјундаи" маркалы автомобиллә һәрәкәт едәркән Нәриманов рајон әразисиндә Дөвләт Јол Полиси тәрәфиндән јол һәрәкәт гајдаларыны позмаг бәһанәси илә сахланылыб.
ДЈП әмәкдашы АИП сәдринин олдуғу автомобилә јахынлашыб вә сүрүҹү Мирһүсејн Казымова вәсигәсини вермәсини тәләб едиб. Сүрүҹүнүн вәсигәни ДЈП әмәкдашына вермәсинә бахмајараг, бундан сонра ирәлидә дајанан гара рәнҝли "ҸИП" маркалы автомобилдән мүлки ҝејимли шәхсләр автомобилә јахынлашараг, Мөвсүм Сәмәдов вә 3 нәфәри полисә табе олмамаг бәһанәси илә сахлајыблар.
Гејд едәк ки, Ислам Партијасынын сәдри вә 3 нәфәри мүхтәлиф машынларда Нәриманов рајон 18 сајлы полис бөлмәсинә ҝәтирилиб вә орада изаһат алындыгдан сонра, сахланылан шәхсләр барәсиндә Бинәгәди рајон мәһкәмәсинин гәрары илә Инзибати Хәталар Мәҹәлләсинин полис ишчиси вә ја һәрби гуллугчу иҹтимаи гајданын мүһафизә вәзифәләрини иҹра едәркән, онларын гануни тәләбләринә гәсдән табе олмамаг (310.1-ҹи) маддәси илә һәбс едибләр.
Һадисә заманы мараглы олан будур ки, јол һәрәкәт гајдаларыны позмагда иттиһам олунан сүрүҹү Мирһүсејн Казымову ДЈП әмәкдашлары јох, мәһз Милли Тәһлүкәсизлик Назирлијинин әмәкдашлары полис бөлмәсинә апарыблар.
Сон мәлуматлара ҝөрә, АИП сәдри Мөвсүм Сәмәдовун һәләдә МТН сахланылдығы билдирилир. Диҝәрләри барәсиндә исә 10, 13 вә 15 суткајадәк һәбс гәти имкан тәдбири сечилиб.
Диггәт: Хәбәрдән истифадә етдикдә мәнбәјә истинад лазымдыр.
