Әһли Бејт -АБНА- хәбәр аҝентлијинин вердији хәбәрә әсасән: Бејнәлхалг Гызыл Хач Комитәсинин (БГХК) Азәрбајҹан нүмајәндәлијинин рәһбәри Шерин Полине журналистләрә ачыгламасында билдириб: “Азәрбајҹан вә Ермәнистан президентләринин октјабр ајында әлдә етдикләри разылыға ҝөрә, ики өлкә арасында һәрби әсир вә мүлки шәхсләрин вә мејитләрин гајтарылмасы илә бағлы интенсив данышыглар давам етдирилир”.
Нүмајәндә дејиб ки, артыг бунун нүмунәси кими, нојабрын 4-дә вә 6-да ики әмәлијјат баш тутуб. БГХК-нын данышыгларда бирбаша иштирак етмәдијини, садәҹә, васитәчи миссијасы јеринә јетирдијини билдирән Ш. Полине бунлары дејиб: “Һазырда данышыглар давам едир. Ики өлкәдә олан әсир вә мүлки шәхсләрин гајтарылмасы сахланылан шәхсләрин арзусу әсасында һәјата кечирилир. Индики мәрһәләдә Азәрбајҹанда сахланылан бир Ермәнистан вәтәндашы вә Ермәнистанда сахланылан бир Азәрбајҹан һәрбчиси өлкәләринә гајытмаг арзусуну билдирибләр. Һазырда бу јөндә ишләр давам етдирилир. Лакин һәлә әмәлијјатын баш тутмасы барәдә там разылылыг әлдә олунмајыб”.
Диггәт: Хәбәрдән истифадә етдикдә мәнбәјә истинад лазымдыр
