Әһли Бејт -АБНА- хәбәр аҝентлији хәбәр верир: Бу сөзләри Иранын Азәрбајҹандакы сәфири Мәһәммәдбагир Бәһрами Иран Ислам Республикасынын Бакыда кечирилән В бејнәлхалг сәрҝисинин ачылышында дејиб.
Дипломат билдириб ки, сәрҝи комплексинин бинасынын тикилмәси үчүн артыг јер ајрылыб вә јахын 1-2 ил әрзиндә бина тикилиб истифадәјә вериләҹәк. Азәрбајҹандакы сәрҝи комплексиндә Иранын 32 вилајәтиндән даими нүмајәндәләр олаҹаг. Иранда истеһсал едилән бүтүн нөв мәһсуллар ил әрзиндә бу комплексдә сәрҝиләнәҹәк.
Сәфир Иран истеһсалы олан газ собаларынын тәһлүкәсизлији мәсәләсинә дә мүнасибәт билдириб: “Иранда истеһсал олунан газ собалары бејнәлхалг стандартлара ҹаваб верир. Биз бунлары Авропа өлкәләринә дә ихраҹ едирик. Газ собаларыны Азәрбајҹана ихраҹ етмәк үчүн дә сертификат алыныб. Собалар тәһлүкәли дејил, јалныз ондан истифадә етмәјин гајдаларына дүзҝүн риајәт етмәк лазымдыр”.
М. Бәһрами гејд едиб ки, Иран Азәрбајҹанла бүтүн саһәләрдә иллик тиҹарәт дөвријјәсини 10 милјард доллара чатдырмаг әзминдәдир: “Үмид едирәм ки, ики өлкәнин рәһбәрләринин сәји нәтиҹәсиндә истәдијимизә наил олаҹағыг”.
Гејд едәк ки, Иран ислам Республикасынын Азәрбајҹанда кечирилән В бејнәлхалг сәрҝиси бу ҝүндән өз ишинә башлајыб. Сәрҝи октјабрын 19-на гәдәр давам едәҹәк.
Диггәт: Хәбәрдән истифадә етдикдә мәнбәјә истинад лазымдыр.
