Әһл Бејт-АБНА-хәбәр аҝентлији - Исраил һәрби гүввәләринин команданлығы мајын 31-дә Гәзза секторунун блокадасыны јармаға ҹәһд ҝөстәрән Азадлыг Карванына һүҹумун тәшкили вә һәјата кечирилмәси заманы ҹидди сәһвә јол вериб.Исраилдә Силаһлы Гүввәләрин Баш Гәрарҝаһ рәиси Габи Ашкеназинин ҝөстәриши илә јарадылан вә истефада олан ҝенерал Гиор Ајлендин рәһбәрлик етдији комиссија белә гәнаәтә ҝәлиб.
Комиссија ијулун 11-дә өз ишини баша чатдырыб вә тәһгигат материалларыны Баш Гәрарҝаһа тәгдим едиб. Һесабат мүдафиә назири Еһуд Барака тәгдим олунаҹаг. Комиссијанын конкрет забитләри мәсулијјәтә ҹәлб олунмасы вә ҹәримә тәтбиг едилмәси барәдә төвсијә вермәк сәлаһијјәти јохдур.
Һесабатда Исраил Һәрби Һава Гүввәләри вә әмәлијјатда иштирак едән диҝәр бөлмәләрин рәһбәрләри сәрт тәнгид олунур. Сәһвләр 3 група бөлүнүб. Биринҹиси, кәшфијјат иши дүзҝүн гурулмајыб, икинҹиси, силаһдан истифадәдән јајынмаг үчүн бүтүн ресурслардан истифадә едилмәјиб, ҝөзләнилмәз мүрәккәб ситуасија илә бағлы вариант һазырланмајыб, үчүнҹүсү, һүҹумда иштирак едән гүввәләр јетәринҹә координасија олунмајыб.
Гејд едәк ки, Исраилдә һөкумәтин ҝөстәриши илә јарадылан диҝәр комиссија һәлә өз ишини давам етдирир. Бу комиссијанын рәһбәри кечмиш һаким Јаков Тиркелјадыр вә комиссијада ики бејнәлхалг експерт вар. Бу комиссија олајы һүгуги гијмәт вермәлидир. Бу комиссијанын һесабаты иҹтимаи характер дашыјаҹаг.
