Әһл Бејт-АБНА-хәбәр аҝентлијинин хәбәринә әсасән Мүдафиә Назирлији Азәрбајҹан вә Ермәнистан гошунларынын тәмас хәттиндә баш верән атышма илә бағлы ачыглама јајыб.Назирлијин мәтбуат хидмәтинин рәиси, полковник-лејтенант Елдар Сабироғлунун ачыгламасында билдирилир: “Һәгигәтән, һәмин истигамәтдә ҝеҹә саат 12 радәләриндә атышма баш вериб вә дөјүш хејли давам едиб. Үмумијјәтлә, бу ҹүр атышмалар сон заманлар тез-тез олур. Бу дәфә дә ермәни силаһлы бирләшмәләри ағыр итки верәрәк ҝери чәкилибләр. Лакин диггәти ҹәлб едән мәгам ондан ибарәтдир ки, дүшмән илк дәфә олараг дөјүш заманы өз мәғлубијјәтини ачыг шәкилдә етираф етмәли олуб. Чох мараглыдыр, адәтән, ермәниләр иткиләрини ҝизләтмәјә чалышырлар. Фикримизҹә, бурада сәбәбләр ахтармаға еһтијаҹ дујулмур”.
Е. Сабироғлу дејиб ки, әһали ичәрисиндә Ермәнистан һакимијјәтинә, орду рәһбәрлијинә гаршы көк салан кәскин наразылыг вә гәзәб һисси онлары мөһкәм горху ичәрисиндә сахлајыр: “Ҝөрүнүр, она ҝөрә дә бу јолу сечибләр. Вердикләри иткинин сајыны јенә азалдыблар. Биздә олан дәгиг мәлумата ҝөрә онлар етираф етдикләриндән даһа чох итки верибләр. Дағлыг Гарабағ мүнагишәсинин һәлли истигамәтиндә апарылан данышыглардан, јениләшмиш Мадрид принсипләриндән гачмаг үчүн Ермәнистан атәшкәс режимини позмагла өзү-өзүнү тәләјә салды ки, бу да јалныз вә јалныз онларын нөвбәти тәхрибаты кими гијмәтләндирилмәлидир. Анҹаг бу јол дејил. Тәҹавүзкар Ермәнистан бирдәфәлик баша дүшмәлидир ки, ишғал етдикләри әразиләрдән динҹ шәкилдә ҝери чәкилмәсә вә јахуд һәр-һансы бу сәпҝили тәхрибатлара әл атса, даһа ағыр зәрбәләр ала биләр. Азәрбајҹан Силаһлы Гүввәләринин буна кифајәт гәдәр имканы вар”.
Гејд едәк ки, өтән ҝүн Азәрбајҹан вә Ермәнистан гошунларынын тәмас хәттиндә атышма олуб. АПА-нын Ермәнистан мәтбуатына истинадән вердији мәлумата ҝөрә, ијунун 18-дә саат 23.30 радәләриндә Тәртәрин Чајлы кәнди истигамәтиндә баш верән атышмада ермәни тәрәфи ҹидди итки вериб.
Ермәнистан Мүдафиә Назирлијиндән билдирилиб ки, атышма заманы 4 ермәни һәрбчи өлдүрүлүб, 4-ү исә јараланыб. Азәрбајҹан тәрәфи дә дөјүшдә итки вериб. Ермәнистан Мүдафиә Назирлији Азәрбајҹан Ордусунун бир әсҝәринин дөјүшдә һәлак олдуғуну, мејитин тәмас хәттинин ермәниләрин нәзарәти алтында олан һиссәсиндә галдығыны хәбәр верир.
