Әһл Бејт-АБНА-хәбәр аҝентлијинин хәбәринә әсасән Гырғызыстанын ҹәнубунда баш верән тоггушмаларда 114 нәфәр һәлак олуб.Мәлумата ҝөрә, бу барәдә Гырғызыстанын Сәһијјә Назирлијиндән билдирилиб.
Ош вилајәтиндә 92, Ҹәлалабад вилајәтиндә исә 22 нәфәр өлүб. Ијунун 11-дән үмумиликдә 1423 нәфәр тибби јардым үчүн мүраҹиәт едиб, онлардан 754-ү хәстәханаја јерләшдирилиб.
Шаһидләрин сөзләринә ҝөрә, өтән ҝеҹә Ошда нисбәтән сакит кечиб, күчәләрдә атәш сәсләри ешидилмәјиб.
Шәһәрдә јерли лидерләрин, гырғыз вә өзбәк ағсаггалларын иштиракы илә барышыг тәдбирләри һәјата кечирилиб. Ҹәлалабадда да өтән ҝеҹә нисбәтән сакит кечиб. Ош вә Ҹәлалабад шәһәрләриндә комендант сааты давам едир.
Бу арада Ҹәлалабад вилајәтинин коменданты Кутатбек Бајболов Ошда етник тоггушмаларын тәшкилиндә тәгсирли билинән шәхсин һәбс олундуғуну ачыглајыб. К. Бајболов һәмин шәхсин танынмыш сијасәтчи олдуғуну, һазырда ифадә вердијини дејиб: “О, ифадәсиндә баш верәнләрдә диҝәр сијаси партијаларын тәмсилчиләринин дә иштирак етдијини билдириб”.
Лакин һәбс олунан шәхсин кимлији истинтаг марагларына ҝөрә ачыгланмыр. Онун ифадәсинә ҝөрә, гаршыдурма јаратмагда мәгсәд өлкәдә кечирилмәси планлашдырылан референдумун гаршысыны алмаг вә һазыркы һакимијјәти девирмәк олуб.
Гырғызыстанда јаранмыш вәзијјәтлә әлагәдар БМТ баш катиби Пан Ҝи Мун ораја хүсуси нүмајәндәсини ҝөндәрмәјә гәрар вериб.
