Мүстәгил сијасәт јүрүтмәк истәјән вә АБШ-ын тәзјигләринә мәруз галан өлкәләр арасында јахынлашма просеси давам едир. Бу дәфә Бразилија президенти, иранлы һәмкары Маһмуд Әһмәдинежад вә диҝәр өлкә рәсмиләри Иранын нүвә програмы әтрафында јаранмыш вәзијјәти мүзакирә етмәк үчүн Теһрана топланыб. Сөһбәт Ирана гаршы мүмкүн јени санксијалардан гачмаг үчүн бејнәлхалг аләмин тәклиф етдији планын гәбулундан ҝедир. Бу плана ҝөрә, Иран онда олан аз зәнҝинләшдирилмиш ураны хариҹә ҝөндәрмәли вә әвәзиндә нүвә јанаҹағы алмалыдыр. Иранын хариҹи ишләр назирлији дүнән мәсәләјлә бағлы разылға ҝәлмәк үчүн әлверишли шәраит јарандығыны дејиб. Русија президенти Димитри Медведјев сәфәрин мүсбәт нәтиҹә верәҹәјинә үмидлә јанашмыр. Һәмчинин АБШ дөвләт Катиби Һиллари Клинтон билдириб ки, Вашинтон Теһранын бу плана мүсбәт, ҹидди ҹаваб верәҹәјинә инанмыр. Түркијә хариҹи ишләр назири Әһмәд Давудоғлу да Иранда сәфәрдәдир. Давудоғлу иранлы һәмкары Мөттәки илә нүвә јанаҹағы мәсәләсини мүзакирә едәҹәк. Диҝәр тәрәфдән Азәрбајҹана ҝәләҹәји ҝөзләнилән Түркијәнин баш назири Рәҹәп Тајјиб Әрдоған да ахшам саатларында журналистләрә вердији ачыгламада Ирандан зәнҝ ҝәлдијини вә Азәрбајҹандан әввәл Ирана сәфәр етмә еһтималы олдуғуну дејиб.
