Әһли Бејт - АБНА – Хәбәр Аҝентлијинин вердији хәбәрә әсасән, һазырда Бакы Ағыр Ҹинајәтләр Мәһкәмәсиндә «Нардаран иши» үзрә мүһакимә олунанлар онлара ән чох ишҝәнҹә верәнләр сырасында әмәлијјатчы Шаһлар Ҹәфәровун да адыны чәкирдиләр. Дедикләринә ҝөрә, һәмин ишҝәнҹәләр сахланыларкән, еләҹә дә ДИН-ин Баш Мүтәшәккил Ҹинајәткарлыгла Мүбаризә Идарәсиндә (БМҸМИ) верилиб. Ш. Ҹәфәров өтән мәһкәмә иҹласында диндириләркән галмагал дүшмүш, она ҝөрә дә диндирмә јарымчыг дајандырылмышды.
Сентјабрын 7-дә кечирилән мәһкәмә иҹласында онун диндирмәси давам етдирилиб. Тәгсирләндирилән шәхсләр бир даһа Шаһлар Ҹәфәровун онлара ишҝәнҹә вердијини билдириб, ајры-ајрылыгда бу барәдә әтрафлы данышыблар.
«ГОЛЛАРЫМЫ ДОҒРАДЫМ»
«Мәни «бандотдел»дә камерадан чыхарыб, әлләрим бағлы вәзијјәтдә буна тәһвил вердиләр, бу да 5-ҹи мәртәбәјә галдырды. Отагда бу иди, Кәрим Әлимәрданов иди, бир дә «Шрек» дејилән бири. Дедиләр ки, јаз, «Аббас ҝәтириб, бизә силаһ пајлајыб». Дедим, «ахы елә шеј олмајыб, неҹә јазым?» Әлләрим бағлы вәзијјәтдә мәнә тәпик вуруб јерә јыхдылар, Кәрим синәмин үстүнә чыхды. Бу да дөјмәјә башлады. Ҹинсијјәт органымын үстүнә чыхыб тапдалајан да бу иди. Һәмин вахт бунлар орада мәнә Нефт Академијасындакы һадисәни мисал чәкдиләр, дедиләр ки, «ҝөрдүн, гапычыны, дөнәрсатаны басдыг, ҝетди». О ишҝәнҹәләрдән сонра мәҹбур олуб, голларымы доғрадым. Бундан сонра јенә камерадан чыхарыб апардылар. Бу дәфә дөрд нәфәр идиләр. Кәрим Әлимәрданов деди ки, «нә артистлик еләјирсән?» Јенә ишҝәнҹә вердиләр, онда дејәндә ки, «Меһрибан Әлијеваја шикајәт јазаҹам», шәхсән бу Шаһлар Ҹәфәров сөјүш сөјдү», – тәгсирләндирилән Ҹаббар Ҹаббаров билдириб.
Шаһлар Ҹәфәров дејиләнләрин һәгигәтә ујғун олмадығыны билдириб.
«ГОРХУРДУЛАР КИ, ӨЛӘРӘМ»
Талеһ Бағыров да она ағыр ишҝәнҹә верән әсас адамлардан биринин Шаһлар Ҹәфәров олдуғуну дејиб:
«Мәни тутуб мебел машынында апаранда, ондан сонра «бандотдел»ин һәјәтиндә сифәтим елә танынмаз һала дүшмүшдү ки, санксија үчүн Нәсими рајон мәһкәмәсинә апаранда узагдан һаким ҝөрүб деди ки, «бу һарда белә һала дүшүб?» Тутулан ҝүн «бандотдел»ин һәјәтиндә үз-ҝөзүм ган ичиндә иди, рәис мүавини деди ки, «апарын, ганы тәмизләјин». Нә гәдәр јујурдулар, ган дајанмырды. Үч ҝүн тәҹили јардым ҝәлди, о мүддәтдә мәнә дәјмәдиләр, горхурдулар ки, өләрәм. Үч ҝүн сонра Милли Шура мәсәләси башлады, әввәлҹә хошлугла данышдлар, разы олмадығымы ҝөрүб кечдиләр позғун, шәрәфсизҹәсинә ишҝәнҹәләрә. Шәхсән бунун (Шаһлар Ҹәфәрову нәзәрдә тутур-ред.) өзүнә дедим ки, «мәним кишилијим сиз дедијиниз үсулла јох, јаландан киминсә үзүнә дурсам, әлдән ҝедәр». Бунлар о гәдәр шәрәфсизликләр еләдиләр ки, һәтта мүстәнтиг белә, деди ки, «бу адам илаһијјатчыдыр, она гаршы бу ҹүр әхлагсызлыглар еләмәјин». Инанын Аллаһа, бунун зәрбәләриндән сонра машында Фәраил гардашымызын сон сөзләри гулағымдан ҝетмир. Машында ән әхлагсыз сөјүшләри бу сөјүрдү».
«БОЈНУМДА БИРИ ОТУРДУ, ДӨЈМӘЈӘ БАШЛАДЫЛАР»
Шаһлар Ҹәфәров Т.Бағыровун да дедикләрини инкар едиб: «Тәсдигләмирәм. Әмәлијјатдан сонра Талеһ Бағыровла һеч бир үнсијјәтим олмајыб».
Тәгсирләндирилән шәхсләрдән Аббас Һүсејнов, Аббас Гулијев, Агил Исмајылов, Расим Ҹәбрајылов, Әли Нуријев дә ишҝәнҹәләрә мәруз галмалары һагда ифадә верибләр.
«Бунун отағында бејсбол чубуғу вар. Бојнумда бири отурду, мәни онунла дөјдүләр», – Әли Нуријев билдириб.
Расим Ҹәбрајылов ишҝәнҹәләрлә јанашы, һәм дә аиләсилә һәдәләндијини дејиб.
Шаһлар Ҹәфәров исә бу тәгсирләндирилән шәхсләри үмумијјәтлә, танымадығыны, онларла һеч бир үнсијјәтинин олмадығыны билдириб.
БАРМАГЛЫГЛАР АРХАСЫНДА АЈАГГАБЫЛАРЫНЫ АТЫБЛАР
«Әҝәр јалан дејирәмсә, Аллаһ мәним бәламы версин, јох, бу јалан дејисә, онун бәласыны. Әҝәр бу адам әмәлијјатдан сонра бизи ҝөрмәјибсә, мән һардан билирәм ки, онун отағы бешинҹи мәртәбәдә солда јерләшир, пәнҹәрәнин гаршысында столу вар, үстүндә дә компүтер. Бејсбол чубуғуну мән дә ҝөрмүшәм отагда», – Аббас Һүсејнов дејиб.
Шаһлар Ҹәфәров исә гејд едиб ки, үмумијјәтлә, ишләдији шөбә бешинҹи мәртәбәдә јерләшир, орада бүтүн отагларда да столлар пәнҹәрәнин гаршысындадыр.
Тәгсирләндирилән шәхсләрин ишҝәнҹә верән әсас адам кими нијә мәһз онун адыны чәкмәси барәдә вәкилләрин суалына исә Ҹәфәров белә ҹаваб вериб: «Һамы барәдә дејә биләрләр…»
Шаһлар Ҹәфәровун диндирмәси баша чатандан сонра тәгсирләндирилән шәхсләрдән бир нечәси дәмир бармаглыглар архасындан она ајаггабы атыблар. Мәһкәмә залында онун үнванына гарғышлар сәсләндирилиб.
«МЕЈИТИ ҜҮЛЛӘЛӘЈИБЛӘР»
Буҝүнкү мәһкәмә иҹласында БМҸМИ-нин даһа бир әмәкдашы Үзејир Саламов да ифадә вериб. О билдириб ки, идарәјә Талеһ Бағыров вә тәрәфдарларынын силаһлы чеврилиш һазырламасы барәдә мәлумат дахил олуб, бунун да әсасында нојабрын 26-да сәһәр саат 10 радәләриндә мүшавирә, ардынҹа да ҝүнорта саат 13.00 радәләриндә дә Нардаранда әмәлијјат кечирилиб. О билдириб ки, әмәлијјат заманы полисләр һәјәтә дахил оларкән орада гумбара атылыб, амма гумбараны атанын кимлијини ҝөрмәјиб.
Үзејир Саламов дејир ки, Фәраил Бүнјадову о зәрәсизләшдириб: «Ҝүлләләри гуртарандан сонра ону зәрәрсизләшдирдим. Мән она һеч бир хәсарәт јетирмәмишәм. Мән зәрәрсизләшдирәркән јаралы иди – дөш гәфәси вә гарын наһијәсиндән. Үзәриндә башга хәсарәт јох иди. Ону Тәҹили Јардым машынына миндириб хәстәханаја јола салмышыг».
Тәгсирләндирилән шәхсләр исә полисин јалан ифадә вердијини билдириб. Онлар билдирибләр ки, Фәраил Бүнјадов јараланмамышды, ону мебел машынында апараркән дөјә-дөјә өлдүрүб, сонра да ҝуја әмәлијјат заманы јараланыб өлдүјү ҝөрүнтүсүнү јаратмаг үчүн мејити ҝүлләләјибләр.
«ОНУ МАШЫНДА ӨЛДҮРДҮЛӘР»
«Фәраил сапсағлам адам иди, ону машында өлдүрдүләр. «Бандотдел»дә бизи дүшүрәндә онун мејитини машында сахладылар» дејән Т.Бағырзадә ону да гејд едиб ки, Нардаранда әмәлијјат кечириләркән орада чәкилиш апарылыб: «Ичәридә 100 фаиз чәкилиш олуб. Садәҹә, өзләринә сәрфәли шејләр олмадығына ҝөрә орталыға чыхартмадылар. Бизим биримизин әлиндә силаһ олсајды, ону дәрһал ортаја гојуб, бүтүн дүнјаја ҝөстәрәрдиләр».
Вәкил Јалчын Иманов да хатырладыб ки, експертиза Фәраил Бүнјадовун үзәриндә ҝүллә јаралары илә јанашы, бәдәниндә, о ҹүмләдән ајағында сыныглар, алнын әзилмәси барәдә рәј вериб.
Мәһкәмә просеси сентјабрын 8-дә давам едәҹәк.
2015-ҹи ил нојабрын 26-да ҝүҹ органлары Бакынын Нардаран гәсәбәсиндә хүсуси әмәлијјат кечирибләр. Әмәлијјат заманы икиси полис олмагла, 6 нәфәр һәлак олуб. Һәмин ҝүн «Мүсәлман Бирлији» Һәрәкатынын сәдри Талеһ Бағыров вә онун бир груп тәрәфдары һәбс едилиб. Сонрадан ҝүҹ структурлары үмумиликдә 70 нәфәрин һәбс едилдијини билдириб. Онлардан даһа јүнҝүл маддәләрлә иттиһам едиләнләрдән бир чохунун мәһкәмәси бир мүддәт өнҹә башлајыб. Бәзиләринә 1 ил 6 ајдан, 2 ил 6 аја гәдәр һәбс ҹәзасы верилиб.
Талеһ Бағыров вә даһа 17 нәфәрин мәһкәмәси ајрылыгда давам едир. Талеһ Бағыров вә онунла сахлананлар гәтлдә, даһа бир чох ағыр ҹинајәтләрдә иттиһам едилир. Тәгсирләндирилән бу иттиһамлары рәдд едирләр, онлардан ифадәләрин ишҝәнҹә алтында алындығыны билдирирләр.
Диггәт: Хәбәрдән истифадә етдикдә мәнбәјә истинад лазымдыр
