Әһли Бејт - АБНА – Хәбәр Аҝентлијинин вердији хәбәрә әсасән, сијаси мәһбус Тале Бағыров Азәрбајҹан халгына мүраҹиәт едәрәк онилләрлә јашадыглары бу коррупсионер вә гысасчыл режимин пис вә јарытмаз идарәчилији алтында әзиләмәсинә сон гојулмасы үчүн 11 Сентјабрда Милли Шуранын планлашдырдығы митингиндә иштирак етмәјә сәсләјиб.
Мүраҹиәтин там мәтни беләдир:
Әзизләрим! Јурддашларым!
Онилләрдир һамымыз коррупсионер вә гисасчыл бир һакимијјәтин пис вә јарытмаз идарәчилији алтында әзилирик. Бу елә бир һакимијјәтдир ки, онун үчүн һәр һансы бир мәнәви дәјәр, әхлаг нормалары вә кечилмәјәси мүмкүн олмајан гырмызы хәтт јохдур. Һамымыз – сағчымыз да, солчумуз да, диндарымыз да, атеистимиз дә әсас мәгсәди даһа чох оғурламаг вә даһа чох әзмәк олан бу антиинсани режимин гурбанларыјыг. Азад сөз сөјләдијинә ҝөрә инсанлар һәбсә атылыр, сијаси һакимијјәти ади тәнгидә ҝөрә узун мүддәтә ҹәзаландырылыр, мин-бир зүлмлә иш јери ачан, һалал чөрәјини газанан саһибкарлар дөвләтин рекет гурумлары тәрәфиндән мүфлис едилир, онлара ајлыг “һагг” гојулур, вермәјәнләр арсеналдакы ән мүхтәлиф шантаж вә гарајахма үсулларыјла сусдурулур, мәһв едилир! Ишҝәнҹә верән полис, дөвләтимизин мәнафеләрини сатан хүсуси хидмәт органлары, сифариш вә пулла гәрар чыхаран мәһкәмәләр, тәһсил вермәјән мәктәбләр, јанлыш диагноз гојан, адам өлдүрән сәһијјә оҹаглары, коррупсионер бүрократик апаратлар ҝүнүмүзүн аҹы реаллыгларыдыр. Инди полис тәһлүкә сачыр, хүсуси хидмәт органлары шантаж јувасыдыр, мәктәбләр тәһсилсизлик, хәстәханалар өлүм јајыр, мәһкәмләр әдаләт мәбәдиндән башга нәјә десән бәнзәјир!
Билирәм, фәргиндәјәм ки, бүтун бу садаладыгларым сизләрә узаг ҝәлә биләр! Амма әмин олун ки, нә баш верирсә, чох јахында баш верир вә һеч ким, ән сыравиниз белә ҝөзәл ҝүнләрин бириндә бу нәһәнҝ шәр-бөһтан машыныјла үз-үзә ҝәлә биләрсиз вә бундан һеч бир Аллаһ бәндәси сығорталанмајыб.
Әзизләрим! Билирәм, әлләриниз габарлы, ҝөзләриниз кәдәрлидир! Аиләләринизин јанында башыашағы вә чарәсизсиниз! Һәр сабаһкы ҝүнү наүмид вә тәлашла ачырсыныз. Гара ҝүн үчүн сахладығыныз ән сон гәпикләринизи банкларын гаршысындакы узун нөвбәләрдә ахшамкы, сабаһкы ҝүзараныныз үчүн хирдалајырсыныз. Амма тәкҹә сон пулларыныз дејил, өзүнүз дә хырдаланырсыныз.
Сиз бу јашајыша лајигсинизми? Әлбәттә ки јох! Јахшы јашајыш, фираван вә әдаләтли ҹәмијјәт үчүн әрзаг вә банк нөвбәләрини һагг вә әдаләт нөвбәләринә дәјишмәк лазымдыр! Әмин олун ки, биз талејимизә саһиб чыхмасаг, әвәзимиздә буну башгалары едәҹәкләр. Неҹә ки едирләр! Дөвләтимизи архамызда ҝөрмәк истәјириксә, дөвләтимизин дәјәрләрини бәрпа етмәлијик!
Әзизләрим! Бу ҝүн, һагг сөз дејән мөмүн дә һәбсдәдир, анархист дә, сағчы да, солчу да, милләтчи дә! Инди гаршылыглы иттиһамлар, дидишмә вә мәјуслуг дөврү дејил! Ҝәлин, бирликдә етираз едәк! Ҝәлин, ганунларын имкан вердији чәрчивәдә һаггларымызы тәләб едәк! Јазыглыг вә лагејдлик, әдаләтсизлик јарадыр, әдаләтсизлијин әлинә ишләјир һәм дә! Јазыг вә талејимизә лагејд олмајаг! Әдаләтсизлик олан јердә ҝүл битмир севҝили јурддашларым!
Биз онларын ирси кин-кудурәти, дәрин нифрәти вә әнәнәви гисасчыллығы гаршысына севҝимизлә, динҹ, амма ардыҹыл етиразымызла чыхаг. Бөјүк инкары олмајанларын, бөјүк тәсдиги дә олмур. Бу, тәкҹә инсанлара аид дејил, һәм дә халглара аиддир.
Һамынызы сентјабрын 11-дә Милли Шуранын планлашдырдығы митингиндә иштирака сәсләјирәм! Ҝәлин, бирликдә “Неомонархијаја сон!” “Талана сон!” дејәк!
Тале Бағырзадә
Диггәт: Хәбәрдән истифадә етдикдә мәнбәјә истинад лазымдыр
