Әһли Бејт - АБНА – Хәбәр Аҝентлијинин вердији хәбәрә әсасән, Азәрбајҹанда ибадәтҝаһлардан кәнарда вә иҹтимаи јерләрдә дини шүарларын сәсләндирилмәси, дини атрибутларын вә дини бајрагларын нүмајиши гадаған олунур. Бунунла мәшғул олан әҹнәбиләр малијјә санксијасы тәтбиг олунмагла, өлкәдән депортасија едиләҹәк.
Милли Мәҹлисдән АПА-ја верилән мәлумата ҝөрә, бунунла бағлы Азәрбајҹан президентинин тәгдиматы илә Инзибати Хәталар Мәҹәлләсинә јени 516.0.3 маддәси тәклиф олунур.
Јени маддәјә ҝөрә, ибадәтҝаһлардан кәнарда, иҹтимаи јерләрдә дини шүарларын вә диҝәр дини атрибутларын (шәхсин үстүндә ҝәздирдији дини атрибутлар истисна олмагла) нүмајиш етдирилмәси, дини бајрагларын ибадәтҝаһларын, дини мәркәз вә идарәләрин гапалы јерләриндән кәнар јерләшдирилмәси гадаған олунур. Бу гадағалар позулдуғу тәгдирдә, вәтәндашлар 2 000 манатдан 2 500 маната гәдәр, вәзифәли шәхсләр 8 000 манатдан 9 000 маната гәдәр, һүгуги шәхсләр исә 20 000 манатдан 25 000 маната гәдәр ҹәримә олунаҹаг. Әҹнәбиләр вә вәтәндашлығы олмајан шәхсләр 2 000 манатдан 2 500 манат ҹәримә едилмәклә, Азәрбајҹан әразисиндән инзибати гајдада чыхарылаҹаглар.
Лајиһә Милли Мәҹлисә тәгдим олунуб вә парламентин нөвбәти иҹласында мүзакирәјә чыхарылаҹаг.
Диггәт: Хәбәрдән истифадә етдикдә мәнбәјә истинад лазымдыр
