Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, бу ҝүн Бакы Ағыр Ҹинајәтләр Мәһкәмәсиндә Гафгаз Мүсәлманлары Идарәсинин сабиг сектор мүдири, илаһијјатчы Елшән Мустафаоғлунун ҹинајәт иши үзрә нөвбәти мәһкәмә просеси кечирилиб.
Просесә һаким Сәбуһи Һүсејнов сәдрлик едиб. Мәһкәмә просеси гапалы кечирирлиб.
Илаһијјатчынын вәкили Әфган Мәммәдов билдириб ки, мүдафиә етдији шәхсә гаршы ирәли сүрүлән иттиһамларын һеч бир әсасы јохдур: “Елшән Мустафоғлу бу ҝүн сәрбәст ифадә вериб. О, өзүнү ҝүнаһкар билмәдијини, она гаршы ирәли сүрүлән иттиһамларын әсасыз олдуғуну дејиб. Ортада онун ҝүнаһыны сүбут едән конкрет фактлар олмадығына ҝөрә, биз дә онун ҝүнаһсызлығыны там сүбут етмәјә чәтинлик чәкирик. Иттиһам тәрәфи ортаја конкрет һеч бир сүбут гојмур. Апарылмыш 1 ил 6 ај әрзиндәки истинтаг заманы онун ҝөстәрилән ҹинајәт әмәлини төрәтмәси барәдә һеч бир сүбут әлдә олунмајыб”.
Вәкил мәһкәмәнин гапалы кечирилдијини вә истинтаг сирринин јајылмамасыны әсас ҝәтирәрәрк әлавә мәлумат вермәк истәмәјиб: “Инанын, бу ишин үстү ачыларса биабырчылыг олаҹаг. Бу, бош хүлјаларла һазырланан ҹинајәт ишидир”.
Мәһкәмә просеси августун 2-дә давам етдириләҹәк.
Гејд едәк ки, Е.Мустафаоғлу һазырлыг иҹласы заманы ләғв едилмиш МТН-дә ондан Аллаһшүкүр Пашазадә вә ҝенерал Рөвшән Әкбәровун әлејһинә ифадә алмаг истәдикләрини демишди.
Хатырладаг ки, Е.Мустафаоғлу 2014-ҹү илин декабр ајында һәбс едилиб. Онун барәсиндә Ҹинајәт Мәҹәлләсинин 274-ҹү (дөвләтә хәјанәт) маддәси илә ҹинајәт иши ачылыб.
Е.Мустафаоғлу 2006-2007-ҹи илләрдә “Иҹтимаи” ТВ-дә каналын ән популјар верилишләриндән олан “Ҹүмә Сөһбәти” верилишинин мүәллифи вә апарыҹысы олуб.
2007-ҹи илдә исә АНС ТВ-дә “Аллаһ Һаггы” верилишинин апарыҹысы олуб.
Диггәт: Хәбәрдән истифадә етдикдә мәнбәјә истинад лазымдыр
