Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, тәкфирчи ИШИД террор тәшкилаты 2014-ҹү илдән Ирагын шимал вә гәрб һиссәсиндә әлә кечирдији әразиләрдә зоракылыглар төрәдир. Белә ки, дүшмән гүввәләри сон ҝүнләр Ирагда мүһарибә бөлҝәсиндән гачмаға чалышан 3-ү ушаг олмагла бир аиләнин 5 үзвүнү дири-дири јандырдығы билдирилиб.
Һадисә чәршәнбә ахшамы Ирагын шималындакы Кәркүк бөлҝәсинин Ријад рајонунда һамынын ҝөзү гаршысында, ачыг шәкилдә төрәдилиб. Террор тәшкилаты өзләринә гаршы һәјата кечирилән һәрби әмәлијјатлардан горунмаг мәгсәдилә јерли әһалидән ҹанлы сәдд кими истифадә едир, бу сәбәбдән бөлҝәни тәрк етмәк истәјәнләрә гаршы ҹәза тәдбирләри ҝөрүр.
Бундан башга ИШИД һәмин ҝүн дөјүш мејданындан гачмагда ҝүнаһландырдығы 35 үзвүнү Мосулун ҹәнубундакы Гајјараһ шәһәринин кәнарында дири-дири торпаға басдырыб.
ИШИД террор тәшкилаты сон ајлар әрзиндә Ираг ордусу вә “Һәшд Шаби” гүввәләринин әмәлијјатлары нәтиҹәсиндә хејли итки вериб. Һәмчинин ишғал етдији торпагларын үчдә ики һиссәсини итириб.
Диггәт: Хәбәрдән истифадә етдикдә мәнбәјә истинад лазымдыр
