Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Милләт вәкили Сијавуш Новрузов јерли мәтбуата вердији мүсаһибәләриндән бириндә 28 Мај Республика Ҝүнү мүнасибәти илә нөвбәти әфв фәрманынын имзаланаҹағынын ҝөзләнилән олдуғуну дејиб. Депутат һәмчинин һәбсдә олан диҝәр сијаси мәһбусларын да азадлыға бурахылма еһтималынын бөјүк олдуғуну ачыглајыб.
Бәс ҝөрәсән 28 мај республика ҝүнү илә әлагәдар әфвин имзаланмасы нә дәрәҹәдә реалдыр?. Һәбсдәки диҝәр сијаси мәһбуслар азадлыға бурахыла биләрми?
ИсламинСеси мөвзуну һүгуг мүдафиәчиси Арзу Абдуллајева илә мүзакирә едиб. Һүгуг мүдафиәчиси билдириб ки, президентин АБШ-дан ҝери дөнмәсини ҝөзләјирләр:
“Һүгуг мүдафиәчиләри нөвбәти әфв фәрманынын 28 мај республика ҝүнүндә дејил, 10 мајда имзаланаҹағыны прогнозлашдырырлар. Анҹаг һәбсдәки диҝәр сијаси мәһбусларын азадлыға бурахылаҹағы еһтималы чох бөјүкдүр”.
Арзу Абдуллајеванын сөзләринә ҝөрә, нөвбәти әфвлә исламчы мәһбусларын да азадлыға бурахылаҹағы ҝөзләнилир: “Демәк олмаз ки бүтүн сијаси мәһбуслар әфв олунаҹаглар. Лакин хүсусилә виҹдан мәһбусу кими танынан шәхсләрин илк олараг һәбсдән бурахылма еһтималы чох бөјүкдүр. Азәрбајҹан һакимијјәтиндә белә бир хүсусијјәт формалашыб. Бир чох сијаси мәһбуслар азадлыға бурахылса да, диҝәрләри һәбсдә сахланылыр. Бу аддым һәмин мәһбусларын һөкумәтдән әфв истәмәси мәгсәди илә атылыр”.
Һүгуг мүдафиәчиси гејд едиб ки, сијаси мәһбус Илгар Мәммәдов барәсиндә Авропа Мәһкәмәсинин гәрары вар вә о мүтләг азадлыға бурахылмалыдыр: “Мөвсүм Сәмәдов вә диҝәр исламчы сијаси мәһбусларын да азадлыға чыхмасыны истәјирик вә бунун үчүн чалышырыг. Чүнки бу инсанларын ҝүнаһлары сүбута јетирилмәјиб. Она ҝөрә дә бөјүк еһтималлар вар ки, бу инсанлар да нөвбәти әфв фәрманы илә азадлыға чыхсынлар”.
Диггәт: Хәбәрдән истифадә етдикдә мәнбәјә истинад лазымдыр
